កីឡាជាតិ
ជាតិ
សហព័ន្ធកីឡាបាល់ទះ គ្រោងបង្កើតពានក្នុងស្រុក និងរៀបចំជំនួបមិត្តភាពជាមួយក្រុមក្នុងតំបន់ ក្រុមបាល់ទះជម្រើសជាតិកម្ពុជា កាលប្រកួតស៊ីហ្គេមលើកទី៣១ ជាមួយហ្វីលីពីន។
× សហព័ន្ធកីឡាបាល់ទះកម្ពុជាគ្រោងបង្កើតពានរង្វាន់ «សម្តេចតេជោ» និងគ្រោងរៀបចំការប្រកួតមិត្តភាពអន្តរជាតិជាមួយបណ្តាប្រទេសក្នុងតំបន់អាស៊ាន ដើម្បីពង្រឹងសមត្ថភាពរបស់ក្រុមកីឡាករមុនព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ។
សម្រាប់ក្រុមកីឡាបាល់ទះបុរសគឺបានត្រៀមខ្លួនរួចរាល់តាំងពីឆ្នាំ២០១៩ មុនព្រឹត្តិការណ៍ស៊ីហ្គេមលើកទី៣១ នៅវៀតណាម ដែលបាល់ទះបុរសកម្ពុជាសម្រេចបានមេដាយ១ពីព្រឹត្តិការណ៍នោះ។ មកទល់ពេលនេះសហព័ន្ធបានបន្តការដឹកនាំ និងយកចិត្តទុកដាក់ពីការហ្វឹកហាត់របស់ក្រុមកីឡាករ ដើម្បីយកឲ្យបានលទ្ធផលល្អនាស៊ីហ្គេមលើកទី៣២ ឆ្នាំ២០២៣។
ជាមួយនឹងការត្រៀមខ្លួន សម្រាប់ការមកដល់នៃព្រឹត្តិការណ៍មិនធ្លាប់មាននៅកម្ពុជានេះដែរ សហព័ន្ធកីឡាបាល់ទះកម្ពុជា បាននិងកំពុងស្វះស្វែងរកយុទ្ធសាស្រ្ត ក្នុងការនាំយកជ័យជម្នះជូនកម្ពុជា នាស៊ីហ្គេមលើកទី៣២ ដោយសហព័ន្ធគ្រោង រៀបចំបង្កើតពានរង្វាន់សម្តេចតេជោ ឡើងក្នុងពេលឆាប់ៗនេះ។ មិនត្រឹមតែប៉ុណ្ណោះ សហព័ន្ធ ក៏បានត្រៀមខ្លួនក្នុងការស្វែងរកនូវគូប្រកួត ដើម្បីស្ទាបស្ទង់សមត្ថភាពសម្រាប់ក្រុមបាល់ទះកម្ពុជាផងដែរ ដោយនឹងមានការចេញទៅប្រកួតនៅក្រៅស្រុក លក្ខណៈមិត្តភាពអន្តរជាតិ។
ក្រុមបាល់ទះកម្ពុជា(ខៀវ) ប្រកួតជម្រុះក្នុងពូលជាមួយ ហ្វីលីពីន(ក្រហម)
លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា ផ្តល់បទសម្ភាសដល់សារព័ត៌មានថ្មីៗ តាមទូរសព្ទថា ៖ «យើងគ្រោងនឹងបង្កើត Event ផ្សេងៗ សម្រាប់ធ្វើម៉េចឲ្យការប្រកួតរបស់ក្រុមជម្រើសជាតិរបស់យើង មានលទ្ធភាពប្រកួត។ ជាក់ស្តែង ពានសម្តេចតាជោ ក៏យើងគ្រោងនឹងធ្វើឆាប់ៗនេះដែរ ក្នុងនោះផងដែរ ក៏ខ្ញុំបានគ្រោងរៀបចំការប្រកួតមិត្តភាពអន្តរជាតិ ជាមួយបណ្តាប្រទេសអាស៊ានរបស់យើង។ ហើយជាតម្រុយ ប្រហែលជាខ្ញុំ ទៅប្រកួតជាមួយសិង្ហបុរី (Singapore) មុន»។
បាល់ទះកម្ពុជា(ខៀវ) លោតបាំង ការគុបពីកីឡាករហ្វីលីពីន(ក្រហម) ក្នុងវគ្គជម្រុះក្នុងពូលB ស៊ីហ្គេមលើកទី៣១ នៅវៀតណាម
គួរំឭកដែរថា សម្រាប់ក្រុមកីឡាបាល់ទះជម្រើសជាតិកម្ពុជា គឺធ្លាប់បានកំណត់គោលដៅថ្មី ដោយប្រជែងមេដាយគួរជាទីគាប់ចិត្ត ក្នុងព្រឹត្តិការណ៍ស៊ីហ្គេម២០២៣ គឺមិនក្រោមមេដាយសំរឹទ្ធ។ នេះបើតាមការបញ្ជាក់ពី លោក អាំង សិរីពិសិដ្ឋ ផ្តល់បទសម្ភាសដល់សារព័ត៌មានថ្មីៗ កាលពីខែមិថុនា។
កាលស៊ីហ្គេមលើកទី៣១ នៅវៀតណាម កម្ពុជាបានបំបែកកំណត់ត្រា ៣៩ឆ្នាំ ដោយទទួលបានមេដាយសំរឹទ្ធ បន្ទាប់ពីយកឈ្នះក្រុមជម្រើសជាតិថៃ ដោយលទ្ធផល ៣-២ សិត (២៥-២៣, ២២-២៥, ២៥-២២, ១៣-២៥, ១៥-១៣)៕
© រក្សាសិទ្ធិដោយ thmeythmey.com