អន្តរជាតិ
នយោបាយអន្តរជាតិ
ប្រមុខការទូតឥណ្ឌា៖ ជាអ្នកជិតខាង ឥណ្ឌាជៀសមិនផុតពីត្រូវមានទំនាក់ទំនងជាមួយរបបយោធាមីយ៉ាន់ម៉ា រដ្ឋមន្រ្តីការបរទេសឥណ្ឌា ស៊ូប្រាម៉ាន់យ៉ាំ ចៃសាន់កា ក្នុងដំណើរទស្សនកិច្ចនៅថៃ។ រូបថត AFP
× រដ្ឋមន្ត្រីការបរទេសឥណ្ឌា ស៊ូប្រាម៉ាន់យ៉ាំ ចៃសានកា នៅថ្ងៃទី១៨ ខែសីហា បានចេញមុខការពារទំនាក់ទំនងរវាងឥណ្ឌាជាមួយរបបយោធាមីយ៉ាន់ម៉ា បើទោះបីជាសហគមន៏អន្តរជាតិកំពុងបង្កើនសម្ពាធ និងសម្ដែងការព្រួយបារម្ភកាន់តែខ្លាំងពីការប្រហារជីវិតអ្នកទោសនយោបាយនាពេលថ្មីៗនេះក្តី។
ស្របពេលដែលយោធាធ្វើរដ្ឋប្រហារ និងឡើងកាន់អំណាច សហគមន៍អន្តរជាតិជាពិសេសប្រទេសលោកខាងលិចមួយចំនួន បានកាត់បន្ថយទំនាក់ទំនងជាមួយរបបយោធា។ យ៉ាងណាមិញផ្ទុយពីប្រទេសផ្សេងៗ ឥណ្ឌា ចិន និងរុស្ស៊ី នៅតែបន្តចូលរួមធ្វើការជាមួយរបបយោធា រួមទាំងមានការធ្វើទស្សនកិច្ចថ្នាក់រដ្ឋមន្ត្រីផងដែរ។
ថ្លែងពីសាកលវិទ្យាល័យ Chulalongkorn ក្នុងទីក្រុងបាងកកនៅថ្ងៃទី១៨ ខែសីហា រដ្ឋមន្ត្រីក្រសួងការបរទេសឥណ្ឌា លោក ស៊ូប្រាម៉ាន់យ៉ាំ ចៃសាន់កា ចាតទុកជំហររបស់ទីក្រុងញូវដែលីលើមីយ៉ាន់ម៉ា ជាជំហរដែលមានភាពជាប់លាប់អស់ជាច្រើនទសវត្សរ៍មកហើយ តាំងពីមីយ៉ាន់ម៉ាបានងើបឈរដើម្បីសេរីភាពប្រឆាំងនឹងអាណានិគមមក។
លោក ចៃសាន់កា ក៏បានបន្តថា ក្នុងនាមជាប្រទេសជិតខាងផ្ទាល់ ឥណ្ឌាមិនអាចជៀសផុតពីការធ្វើការជាមួយរបបយោធា ដោយសារតែបញ្ហាព្រំដែន ឧក្រិដ្ឋកម្មឆ្លងដែន ជំងឺកូវីដ-១៩ និងក្រុមបះបោរឥណ្ឌានៅក្នុងមីយ៉ាន់ម៉ាជាដើម។ បើតាមមន្រ្តីឥណ្ឌា ក្នុងនាមជាអ្នកជិតខាងផ្ទាល់ ឥណ្ឌាមានការយល់ចិត្ត និងការយោគយល់ដែលខុសពីប្រទេសដទៃលើការជំរុញលទ្ធិប្រជាធិបតេយ្យនៅមីយ៉ាន់ម៉ា។
«យើងជឿជាក់យ៉ាងមុតមាំថា ការក្លាយជាប្រទេសប្រជាធិបតេយ្យនឹងជាជម្រើសល្អបំផុតសម្រាប់មីយ៉ាន់ម៉ាដែលឆ្លុះបញ្ចាំងពីមនោសញ្ចេតនា និងតម្រូវការរបស់ប្រជាជន»។ ប្រមុខការទូតឥណ្ឌាលើកឡើងបែបនេះ។
គួររំលឹកថា នៅពីដើមឆ្នាំនេះ ឯកអគ្គរដ្ឋទូតថ្មីរបស់ឥណ្ឌា បានបង្ហាញលិខិតសារតាំងដល់មេដឹកនាំរដ្ឋប្រហារ មីន អ៊ុងឡាំង ដែលធ្វើឱ្យឥណ្ឌាក្លាយជាប្រទេសមួយក្នុងចំណោមប្រទេសមួយចំនួនដែលទទួលស្គាល់របបយោធាជារដ្ឋាភិបាលស្របច្បាប់៕
© រក្សាសិទ្ធិដោយ thmeythmey.com