សាជីវកម្មធានាឥណទានកម្ពុជា (CGCC) កំពុងផ្តល់ការធានាឥណទានដែលបញ្ចេញដោយធនាគារ និងគ្រឹះស្ថានមីក្រូហិរញ្ញវត្ថុមួយចំនួនទៅអ្នកស្នើសុំកម្ចីដែលខ្វះទ្រព្យបញ្ចាំ។ បច្ចុប្បន្ន​ ក្រៅពីCGCC  ហើយនោះ ក្រសួង​សេដ្ឋកិច្ច និង​ហិរញ្ញវត្ថុ ​​រួមទាំងធនាគារជាតិនៃកម្ពុជា(NBC) បាន​លើកទឹកចិត្ត​ឱ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ ​ប្រើប្រាស់​នូវ​យន្តការ​ធានា​ឥណទាន ដើម្បី​ជំរុញ​បរិយាប័ន្ន​ហិរញ្ញវត្ថុ និង​អភិវឌ្ឍ​សហគ្រាស​ធុន​តូច និង​មធ្យម(SMEs)។

 

លោក រស់ សីលវ៉ា រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ និង​ជា​ប្រធាន​ក្រុមប្រឹក្សាភិបាលCGCC បានលើកឡើងថា រាជរដ្ឋាភិបាល​បាន​ដាក់​ដំណើរការ​នូវ​គម្រោង​ធានា​ឥណទាន ​តាមរយៈ​សាជីវកម្ម​ធានា​ឥណទាន​កម្ពុជា បាន​ជាង​មួយ​ឆ្នាំ​មកហើយ។  ​គិត​មក​ត្រឹម​ដំណាច់​ខែ​កក្កដា ឆ្នាំ​២០២២ CGCC បាន​គាំទ្រ​លើ​ការបញ្ចេញ​កម្ចី​ថ្មីៗ​ប្រមាណ ៥៧លាន​ដុល្លារ ​ដល់​ក្រុមហ៊ុន​អាជីវកម្ម​ដែល​ខ្វះ​ទ្រព្យ​បញ្ចាំ តាមរយៈ​គ្រឹះស្ថាន​ហិរញ្ញវត្ថុ​ចូលរួម​។ 

 

ក្នុង​សិក្ខាសាលា​ស្តីពី​សក្តានុពល​នៃ​គម្រោង​ធានា​ឥណទានក្នុង​ការលើកស្ទួយ​បរិយាប័ន្ន​ហិរញ្ញវត្ថុ​ សម្រាប់​SMEsនៅកម្ពុជា នា​ថ្ងៃទី​១៨សីហា លោក រស់ សីលវ៉ា  បានបញ្ជាក់ថា៖«​​ ទឹកប្រាក់ ៥៧លាន​ដុល្លារ​នេះ ​គឺជា​ចំនួន​តិចតួច​នៅឡើយ ប៉ុន្តែ​វា​ជាការ​ចាប់ផ្តើម​នៃ​ការផ្លាស់ប្តូរ​ទម្លាប់​នូវ​ការផ្តល់​កម្ចី ដោយ​មិន​ផ្អែក​លើ​ទ្រព្យ​បញ្ចាំ​នៅក្នុង​ទីផ្សារ​ឥណទាន​របស់​​កម្ពុជា»​។ 

 

បើតាមរដ្ឋមន្ត្រីលេខាធិការក្រសួងសេដ្ឋកិច្ចរូបនេះ យន្តការ​ធានា​ឥណទាន គឺជា​ឧបករណ៍​គោលនយោបាយ​អន្តរាគមន៍​មួយ​ដែល​ត្រូវបាន​ប្រើប្រាស់​ ដើម្បី​គាំទ្រ​ផ្នែក​ហិរញ្ញប្បទាន​នៅក្នុង​សេដ្ឋកិច្ច​នៅតាម​បណ្តា​ប្រទេស​នានា​ក្នុង​សកលលោក​។

 

ជាមួយគ្នានេះ លោកស្រី ជា សិរី​ អគ្គនាយិកា​បច្ចេកទេស​ធនាគារជាតិ​នៃ​កម្ពុជា បានលើកឡើងថាការផ្តល់ការធានាឥណទានតាមរយៈ CGCC គឺជាដំណោះស្រាយដ៏ល្អសម្រាប់តម្រូវការបច្ចុប្បន្ន ប៉ុន្តែមិនមានន័យថា SMEs អាចជិះសេះលែងដៃនោះទេ។ លោកស្រីបានបន្តដូច្នេះ៖ «ស្របពេលដែលមានការគាំទ្រពីរាជរដ្ឋាភិបាលលើយន្តការធានាឥណទាននេះ SMEs ត្រូវពង្រឹងសមត្ថភាពដើម្បីអាចមានម្ចាស់ការខ្លួនឯងនាពេលអនាគត ដូចជាការទាញយកផលប្រយោជន៍ពីបច្ចេកវិទ្យាថ្មីៗឱ្យបានច្រើនសម្រាប់អភិវឌ្ឍន៍កាន់តែប្រសើរ»។​

 

ក្រៅពីនេះ លោកស្រី ​សង្កេតឃើញថា ​SMEs នៅ​កម្ពុជា​ភាគច្រើន គឺ​មិនទាន់​បាន​ចុះបញ្ជី​ត្រឹមត្រូវ ដែលនេះជា​បញ្ហា​​ធ្វើឱ្យ​ពួកគាត់​ពិបាក​ទទួល​បាន​កម្ចី​ពី​ធនាគារ​​។

 

បើតាមលោក Wong Keet Loong អគ្គនាយក CGCC ចាប់ពីដើមត្រីមាសទី៣ ឆ្នាំ ២០២២  CGCC បានពង្រីកការធានាឥណទានទៅកាន់ទូទាំងប្រទេស សូម្បីតែនៅក្នុងខេត្តដាច់ស្រយាលក៏ដោយ ដោយសារតែមានបណ្តាញសាខាដ៏ទូលំទូលាយរបស់គ្រឹះស្ថានហិរញ្ញវត្ថុចូលរួម (PFIs) របស់ CGCC នៅទូទាំងប្រទេស។ លោក បន្តថា៖ « ទោះជាយ៉ាងណាក៏ដោយ ក៏ CGCC នៅតែត្រូវធ្វើបន្ថែមទៀត ដើម្បីធានាថាបរិយាបន្នហិរញ្ញវត្ថុ កាន់តែត្រូវបានលើកកម្ពស់សម្រាប់ជាប្រយោជន៍ដល់ក្រុមហ៊ុនអាជីវកម្មពាសពេញប្រទេស»។​

 

យោងតាមរបាយការណ៍របស់​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ បច្ចុប្បន្ន កម្ពុជាមាន សហគ្រាស​ធុន​តូច និង​មធ្យម រួមទាំងសិប្បកម្ម​ផ្នែក​កម្មន្តសាល ចំនួន​៤៣ ៨១៣ មូលដ្ឋាន ដែលបង្កើតការងារជូនពលរដ្ឋបាន ជាង៤៤ម៉ឺននាក់៕