កីឡាជាតិ
ជាតិ
អគ្គិសនីស្វាគមន៍ព្រះខ័នរាជ កោះកុងទទួលបឹងកេត ក្រោនប៉ះណាហ្គា វិសាខាទៅជួបទ័ព លោក Conor Nestor គ្រូបង្វឹករបស់ព្រះខ័នរាជស្វាយរៀង រូបពីពានសម្ដេច ហ៊ុន សែន
× ពានរង្វាន់សម្តេច ហ៊ុន សែន ឆ្នាំ២០២២ ឈានដល់ជំនួបជើងទីមួយនៃវគ្គ៨ក្រុមចុងក្រោយ ដោយនៅវេលាម៉ោង៣ និង៣០នាទី អគ្គិសនីកម្ពុជាដែលជាក្រុមលេខ១ក្នុងខេមបូឌានលីគ២ ត្រូវស្វាគមន៍ក្រុមលេខមួយក្របខណ្ឌកំពូលខេមបូឌានលីគ ព្រះខ័នរាជស្វាយរៀង ខណៈកោះកុងដែលជាក្រុមពីក្របខណ្ឌទី២មួយទៀត ទទួលបឹងកេត។ ឈានដល់ម៉ោង៦ និង៣០នាទី ភ្នំពេញក្រោនប៉ះភ្ញៀវណាហ្គាវើលដ៍ ស្របពេលដែលវិសាខា ប្រកួតនៅលើទឹកដីរបស់កងយោធពលខេមរភូមិន្ទ។
លោក ទុំ សារ៉ាយ គ្រូបង្វឹកអគ្គីសនីកម្ពុជា បានប្រាប់សារព័ត៌មានថ្មីៗតាមទូរសព្ទថា មួយរយៈមកនេះ ក្រុមពិបាកក្នុងការត្រៀមខ្លួនបន្ដិច ដោយត្រូវការរៀបចំខ្លួនផង ធ្វើដំណើរទៅប្រកួតផង និងបញ្ហារបួសកីឡាករ ប៉ុន្ដែកីឡាកររបស់ក្រុម នៅតែអាចប្រកួតបាន។ គ្រូបង្វឹករូបនេះ ចាត់ទុកថាការលើកទឹកចិត្តកីឡាករ គឺមានសារសំខាន់ បើទោះជួបការលំបាក តែពួកគេនៅតែអាច មានចិត្តសាមគ្គីជាក្រុម។
លោក សារ៉ាយ បានវាយតម្លៃថា៖ «ខាងគេ ក៏មើលឃើញខាងយើង ហើយខាងយើង ក៏មើលឃើញចំណុចខ្លាំងឬខ្សោយរបស់គេដូចគ្នា។ យើង នឹងរៀបចំទម្រង់លេងឲ្យបានល្អ ទាំងការវាយបកដោយមានប្រសិទ្ធភាព។យើងនឹងសម្រេចទីឲ្យបាន ប្រសិនជាមានឱកាស មិនឲ្យរបូតគ្រាប់បាល់ដូចកាលប្រកួតជាមួយគិរីវង់សុខសែនជ័យឡើយ។»។
ជាមួយគ្នានេះដែរ លោក Conor Nestor គ្រូបង្វឹកព្រះខ័នរាជ ស្វយរៀង បានបញ្ជាក់តាមតេឡេក្រាមថាការត្រៀមខ្លួនប្រកួតជាមួយ ក្រុមម្ចាស់ផ្ទះ ពិតជាមានការលំបាកព្រោះក្រុមព្រះខ័នរាជស្វាយរៀង ទើបតែប្រកួតជាមួយ ភ្នំពេញក្រោន កាលពីថ្ងៃសៅរ៍។ «ការត្រៀមខ្លួន មានការលំបាក ព្រោះយើងទើបជួបការប្រកួតដ៏តានតឹងកាលពីថ្ងៃសៅរ៍ប៉ុន្ដែយើងបានត្រៀមខ្លួនរួចហើយ ដើម្បីភ្លក្សរសជាតិលំបាកនេះ។»។
លោក ទុំ សារ៉ាយ គ្រូបង្វឹកអគ្គីសនីកម្ពុជា រូបពីពានសម្ដេច ហ៊ុន សែន
គ្រូបង្វឹករូបនេះ បន្ថែមថា ឆ្នាំ២០១៧ នៅជើងទី១ ក្រុមអគ្គីសនីកម្ពុជាប្រកួតបានយ៉ាងល្អ ដោយបញ្ចប់ទៅ ស្មើក្នុងលទ្ធផល២-២ បន្ដែជើងទី២បានចាញ់ព្រះខ័នរាជស្វាយរៀង ក្នុងលទ្ធផល២-៤។ អគ្គីសនីកម្ពុជាជាក្រុមដែលមានទម្រង់វាយបក ដ៏មានប្រសិទ្ធភាពមួយ។
ទន្ទឹមពេលគ្នានេះ នៅទីលានបាល់ទាត់វិទ្យាល័យចំណេះដឹងទូទៅ និងបច្ចេកទេសតេជោសែនកោះកុងក្រុមម្ចាស់ផ្ទះ ស្វាគមន៍ បឹងកេត។ លុះចូលដល់វេលាម៉ោង ៦:៣០ល្ងាច ភ្នំពេញក្រោនប្រកួតជាមួយ ណាហ្គាវើលដ៍ នៅកីឡដ្ឋាន Smart RSN ស្របពេល ជំនួបរវាងក្រុមទ័ព និង វិសាខានៅកីឡដ្ឋានស្តាតចាស់។
ព្រះខ័នរាជ ស្វាយរៀង បានគ្រងជើងឯង៤សម័យ, កងយោធពលខេមរភូមិន្ទ ៣សម័យ, ភ្នំពេញក្រោន ២សម័យ, វិសាខា ២សម័យ ចំណែក ណាហ្គាវើលដ៍ ១សម័យ ដូចគ្នាទៅនឹងបឹងកេត។ វិសាខា គឺជាក្រុមការពារតំណែងជើងឯក ២សម័យកាលជាប់គ្នា៕
Tag:
បាល់ទាត់
ពានសម្ដេច ហ៊ុន សែន
© រក្សាសិទ្ធិដោយ thmeythmey.com