អន្តរជាតិ
ទីភ្នាក់ងារជនភៀសខ្លួន UN អំពាវនាវរកជំនួយបន្ថែមឱ្យជនភាគតិចរ៉ូហ៊ីងយ៉ានៅបង់ក្លាដែស រូបថត Xinhua
× ស្នងការទទួលបន្ទុកជនភៀសខ្លួនរបស់អង្គការសហប្រជាជាតិ (UNHCR) នៅថ្ងៃទី២៣ ខែសីហា បានអំពាវនាវបណ្ដាប្រទេសក្នុងពិភពលោកផ្ដល់ជំនួយបន្ថែមដល់ជនភៀសខ្លួនរ៉ូហ៊ីងយ៉ានៅបង់ក្លាដែសដែលកំពុងខ្វះខាតក្នុងជីវភាពរស់នៅ។ បើតាម UNHCR ជំនួយដែលទទួលបាន មានតិចជាងពាក់កណ្ដាលនៃគម្រោងចំណាយសរុប។
ជនភាគតិចរ៉ូហ៊ីងយ៉ាជាងមួយលាននាក់ដែលភៀសខ្លួនពីអំពើហិង្សានៅមីយ៉ាន់ម៉ា កំពុងរស់នៅក្នុងជំរំរខេករខាកនៅភាគខាងត្បូងបង់ក្លាដែស។ ពួកគេពឹងផ្អែកទាំងស្រុងលើជំនួយរបស់សហគមន៍អន្តរជាតិ។
បើតាមសេចក្តីថ្លែងការណ៍របស់ស្នងការទទួលបន្ទុកជនភៀសខ្លួនអង្គការសហប្រជាជាតិ (UNHCR) ដែលជាស្ថាប័នរកជំនួយឱ្យក្រុមជនភាគតិចនេះ ជនភៀសខ្លួនរ៉ូហ៊ីងយ៉ានៅបង់ក្លាដែសមានចំនួនច្រើនលើសលប់ ណែនណាន់ពេញជំរំនៅ Cox Bazar ទឹកដីបង់ក្លាដែស ហើយជួបបញ្ហាខ្វះខាតខ្លាំង។
«តម្រូវការទូទៅដែលខ្វះខាតខ្លាំងរួមមានអាហារូបត្ថម្ភដែលត្រឹមត្រូវ ផ្ទះសម្បែង គ្រឿងបរិក្ខារផ្នែកអនាម័យ និងឱកាសការងារសម្រាប់ចិញ្ចឹមជីវិត»។ UNCHR បានលើកឡើងបែបនេះក្នុងសេចក្ដីថ្លែងការណ៍ថ្ងៃទី២៣ ខែសីហា។
ក្នុងឆ្នាំ២០២២ ទីភ្នាក់ងារ UNCHR មានផែនការស្វែងរកជំនួយសរុប៨៨១លានដុល្លារសម្រាប់មនុស្សជាង១,៤លាននាក់រួមទាំងជនភៀសខ្លួនរ៉ូហ៊ីងយ៉ានៅបង់ក្លាដែស និងប្រជាជនបង់ក្លាដែសមួយចំនួនដែលក្រីក្ររងទុក្ខលំបាកខ្លាំងដែរ។ មកដល់ពេលនេះ ជំនួយជាក់ស្ដែងមានត្រឹមតែ៤៩ភាគរយប៉ុណ្ណោះ ដែលស្មើនឹង៤២៦,២លានដុល្លារ។
ស្របគ្នានោះ ក្រុមជនភៀសខ្លួនរ៉ូហ៊ីងយ៉ាផ្ទាល់ បានស្នើឱ្យបណ្ដាប្រទេសក្នុងពិភពលោកគិតគូរពីភាពលំបាករបស់ពួកគេផង ព្រោះមិនទាន់អាចត្រឡប់ទៅមីយ៉ាន់ម៉ាវិញបាន ហើយការរស់នៅបង់ក្លាដែស ក៏មិនមានលទ្ធភាពធ្វើការថែមទៀត។
ជនភាគតិចរ៉ូហ៊ីងយ៉ាភាគច្រើនភៀសខ្លួនទៅបង់ក្លាដែសនៅពេលមានការបង្ក្រាបដោយយោធាមីយ៉ាន់ម៉ាក្នុងឆ្នាំ ២០១៧។ ជុំវិញបញ្ហានេះ មីយ៉ាន់ម៉ាកំពុងប្រឈមមុខនឹងការចោទប្រកាន់ពីបទប្រព្រឹត្តអំពើប្រល័យពូជសាសន៍នៅតុលាការយុត្តិធម៌អន្តរជាតិទីក្រុងឡាអេផងដែរ៕
© រក្សាសិទ្ធិដោយ thmeythmey.com