សេចក្តីប្រកាសព័ត៌មានរបស់រដ្ឋបាលខេត្តព្រះសីហនុ បានឲ្យដឹងថា រាល់ទីតាំងអាជីវកម្ម ដែលជនល្មើសប្រើប្រាស់សម្រាប់ការទិញ-លក់កម្លាំងពលកម្ម ការជួញដូរ និងការបង្ខាំងមនុស្សដោយខុសច្បាប់ ត្រូវបិទចោលជាដាច់ខាត។ សេចក្តីប្រកាសព័ត៌មានបន្តថា ប្រតិបត្តិការស្រាវជ្រាវ និងបង្ក្រាបបទល្មើសទាំងនេះ ស្ថិតក្រោមការសម្របសម្រួលរបស់តំណាងអយ្យការ។ 
 

រដ្ឋបាលខេត្តព្រះសីហនុ សង្កត់ធ្ងន់ក្នុងសេចក្តីប្រកាសព័ត៌មានដូច្នេះថា៖«ចំពោះប្រតិបត្តិការស្រាវជ្រាវ និងបង្ក្រាបករណីទិញ-លក់ពលកម្ម ជួញដូរ និងបង្ខាំងដោយខុសច្បាប់ អាជ្ញាធរ នឹងអនុវត្តឲ្យបានហ្មត់ចត់ជាទីបំផុត ដោយស្រាវជ្រាវឲ្យដល់ឫសគល់ និងមេខ្លោង ដើម្បីនាំខ្លួនជនល្មើសទៅផ្តន្ទាទោសតាមច្បាប់ឲ្យខានតែបាន»។ 
 

កាលពីថ្ងៃទី២៣ ខែសីហា ឆ្នាំ២០២២ កម្លាំងនគរបាលខេត្តព្រះសីហនុ ទើបនឹងចាប់បានជនល្មើសជាជនជាតិចិន៥នាក់ ដែលបានចាប់បង្ខាំងស្រ្តីជនជាតិម៉ាឡេស៊ីម្នាក់ ដើម្បីជំរិតទារប្រាក់ពីនាង។ លោក ជួន ណារិន្ទ ស្នងការខេត្តព្រះសីហនុ អះអាងជាមួយសារព័ត៌មានថ្មីៗថា សមត្ថកិច្ចជំនាញ កំពុងស្រាវជ្រាវបន្តលើករណីនេះ។ 
 

កាលពីអំឡុងខែកក្កដា ឆ្នាំ២០២២ សហរដ្ឋអាម៉េរិក បានដាក់កម្ពុជា ចូលទៅក្នុងបញ្ជីខ្មៅនៃក្រុមប្រទេស ដែលមានការជួញដូរមនុស្សធ្ងន់ធ្ងរ។ ក្រោយមក សម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្រកាសក្នុងពិធី១ថា កម្ពុជា ត្រូវធ្វើប្រតិបត្តិការទ្រង់ទ្រាយធំ ដោយចុះត្រួតពិនិត្យកន្លែងស្នាក់នៅរបស់ជនបរទេសទាំងអស់ក្នុងប្រទេសកម្ពុជា ដើម្បីស្វែងរកករណីជួញដូរមនុស្ស។ លើកលែងតែមន្រ្តីការទូតប៉ុណ្ណោះ ដែលរួចផុតពីការចុះត្រួតពិនិត្យនេះ៕