ជាតិ
៥ឆ្នាំនេះ ក្រសួង សង់ប្រព័ន្ធធារាសាស្ត្រ២១៨គម្រោង និងពង្រីកការស្រោចស្រពជាង ១២ម៉ឺនហិកតា លើវិស័យកសិកម្ម រូបពីក្រសួងធនធានទឹកនិងឧតុនិយម
×
ដោយ៖ វ៉ន ស៊ីចេន
ភ្នំពេញ៖ ៥ឆ្នាំនេះ ក្រសួងធនធានទឹក និងឧតុនិយម បានអភិវឌ្ឍន៍ប្រព័ន្ធធារាស្រ្តទាំងតូចទាំងធំ ចំនួន២១៨គម្រោង និងពង្រីកការដាំដុះដំណាំស្រូវជាង៨ម៉ឺនហិកតា ស្រូវប្រាំងវស្សាជាង៤ម៉ឺនហិកតា និងដំណាំផ្សេងៗជាង៤ពាន់ហិកតា។
ក្រសួងធនធានទឹក ក៏បានបង្កើតសហគមន៍ចំនួន៧៨ ស្មើជាង៤ម៉ឺន គ្រួសារ ដែលអាចប្រើប្រាស់ទឹកដោយតុម្លាភាព សម្រាប់ស្រោចស្រពដំណាំលើផ្ទៃដីសរុបជាង២៤ម៉ឺនហិកតា ។ ក្នុងនោះស្រូវវស្សាជាង១៨ម៉ឺន ហិកតា និងស្រូវប្រាំងជាង១ម៉ឺនហិកតា។
ជាមួយគ្នានេះ ក្រសួងធនធានទឹក បានសាងសង់នូវទំនប់ការពារទឹកជំនន់មួយ១គម្រោង ដែលអាចការពារលំនៅដ្ឋានរបស់ប្រជាពលរដ្ឋចំនួន១០០គ្រួសារ នៅស្រុកពញាឭ ខេត្តកណ្ដាល ។ ក្រៅពីនេះ ក្រសួងក៏បានជួសជុលថែទាំទំនប់ចំនួន៥គម្រោង ដែលអាចការពារផ្ទៃដីជិត៦ពាន់ហិកតា និងលំនៅដ្ឋានជាង ១ម៉ឺនគ្រួសារ នៅខេត្តកណ្ដាល និងរាជធានីភ្នំពេញផងដែរ។
លើសពីនេះ ក្រសួង ក៏ពង្រឹងការគ្រប់គ្រង ការប្រើប្រាស់ និងថែទាំសំណង់ការពារទឹក ដើម្បីធានាបាននូវសន្តិសុខទឹក ទាំងបរិមាណ គុណភាព និងប្រភពទឹក។ ជាពិសេសទ្រទ្រង់កំណើនសេដ្ឋកិច្ចជាតិ និងគ្រប់គ្រងបញ្ហាទឹកជំនន់ និងគ្រោះរាំងស្ងួតឲ្យមានប្រសិទ្ធភាពខ្ពស់។
ចំពោះការអភិវឌ្ឍប្រព័ន្ធធារាសាស្ត្រ ៥ឆ្នាំនេះ ក្រៅពីថវិការដ្ឋាភិបាល ក៏មានដៃគូនិងស្ថាប័នអន្តរជាតិនានា ផ្ដល់ហិរញ្ញវត្ថុ ជួយទ្រទ្រង់ផងដែរ។ ក្នុងនោះមានប្រទេសចិន ចំនួន៣គម្រោង ប្រព័ន្ធស្រោចស្រពបានជាង១ម៉ឺនហិកតា និងស្តុកទឹកបាន២៥៧លានម៉ែត្រគីប ,កូរ៉េខាងត្បូងចំនួន ៣គម្រោង ស្រោចស្រពបានជាង៧ម៉ឺន និងស្តុកទឹកបាន១៧៧ម៉ែត្រគីប, ជប៉ុន ១គម្រោង ស្រោចស្រពបានជាង១ម៉ឺនហិកតា , អូស្ត្រាលី ៥គម្រោង ស្រោចស្រពបាន ជាង៦ពាន់ហិកតា, ទីភ្នាក់ងារអភិវឌ្ឍបារាំង (AFD) ៣គម្រោង ស្រោចស្រពបាន ជាង៧ពាន់ហិកតា និង ADB ជាដើម។ នេះបើតាមរបាយការណ៍ក្រសួងធនធានទឹក និងឧតុនិយម នាថ្ងៃទី២៥ សីហា ឆ្នាំ២០២២៕
Tag:
សេដ្ឋកិច្ច
សង្គម
ក្រសួងធនធានទឹក
© រក្សាសិទ្ធិដោយ thmeythmey.com