ជាតិ
សង្គមជាតិ
លោក ហ៊ុន ម៉ានិត និងលោក ទៀ សីហា ប្រាប់ឲ្យលោក ខឹម វាសនា ឈប់បំផុសបំផុល និងរំសាយការជួបជុំ
× សៀមរាប៖ អភិបាលខេត្តសៀមរាប លោក ទៀ សីហា និងស្នងការខេត្ត រួមទាំងលោក ហ៊ុន ម៉ានិត អគ្គនាយក នៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ នារសៀលថ្ងៃទី២៧ ខែសីហា បានដឹកនាំក្រុមការងារ ចុះទៅពិនិត្យការជួបជុំរបស់ប្រជាពលរដ្ឋ នៅដីចម្ការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ក្រោយមានការកៀរគរមនុស្សប្រមាណ២ម៉ឺននាក់នៅផ្ទះរបស់លោក។
លោក តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប បានប្រាប់សារព័ត៌មានថ្មីៗថា អភិបាលខេត្ត និងអាជ្ញាធរបានប្រាប់ឲ្យលោក ខឹម វាសនា ផ្អាក និងឈប់ធ្វើសកម្មភាពបំផុសបំផុលតាមពាក្យទំនាយថា «បាងកករលំ ភ្នំពេញរលាយ ព្រៃនគរខ្ចាត់ខ្ចាយ សម្បូរសប្បាយនគរវត្ត» នេះទៀត ព្រោះវាធ្វើឱ្យពលរដ្ឋចលាចល និងខាតបង់ផលប្រយោជន៍ផ្ទាល់ខ្លួនរបស់ពួកគេ។
បន្ថែមពីនេះ អភិបាលខេត្តសៀមរាប និងអាជ្ញាធរបានប្រាប់ឱ្យលោក ខឹម វាសនា រំសាយការជួបជុំគ្នានេះនៅត្រឹមថ្ងៃទី២៨ សីហា។ លោក ខឹម វាសនា យល់ព្រមសហការជាមួយអាជ្ញាធរ ប៉ុន្តែលោកសុំពន្យាពេលរំសាយការប្រមូលផ្ដុំនេះ នៅថ្ងៃទី៣០ សីហា។ នេះបើតាមលោក តេង ច័ន្ទណាត ស្នងការនគរបាលខេត្តសៀមរាប។
សូមស្ដាប់កិច្ចសម្ភាសខ្លីរវាងលោក តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប និងអ្នកស្រី អ៊ីសា រ៉ហានី អ្នកសារព័ត៌មានថ្មីៗ ដូចតទៅ៖
© រក្សាសិទ្ធិដោយ thmeythmey.com