លោក វេង សាខុន ប្រាប់និស្សិតកសិកម្មនៅអ៊ីស្រាអែល ឱ្យយកចំណេះ និងបច្ចេកទេសល្អៗទៅកសាង និងអភិវឌ្ឍប្រទេសវិញ

ជាតិ

លោក វេង សាខុន ប្រាប់និស្សិតកសិកម្មនៅអ៊ីស្រាអែល ឱ្យយកចំណេះ និងបច្ចេកទេសល្អៗទៅកសាង និងអភិវឌ្ឍប្រទេសវិញ

02, Sep 2022 , 9:59 pm

រូបភាព

លោក វេង សាខុន រួមទាំងនិស្សិតកសិកម្មកម្ពុជា នៅអ៊ីស្រាអែល។ រូបភាពពីហ្វេសប៊ុកលោក វេង សាខុន។

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ក្នុងដំណើរទស្សនកិច្ចនៅអ៊ីស្រាអែល លោក វេង សាខុន រដ្ឋមន្រ្តីក្រសួងកសិកម្ម បានចូលរួមចែកសញ្ញាបត្រដល់និស្សិតកសិកម្មកម្ពុជាចំនួន ២០០នាក់ ដែលបញ្ចប់វគ្គបណ្តុះបណ្តាលបច្ចេកទេសកសិកម្មរយៈពេល ១១ខែ កាលពីថ្ងៃទី២៩ សីហា។ ក្នុងពិធីចែកសញ្ញាបត្រនេះ រដ្ឋមន្រ្តីកសិកម្មកម្ពុជា បានណែនាំឱ្យនិស្សិតគ្រប់រូបត្រូវនាំយកចំណេះដឹង និងបទពិសោធន៍ល្អៗ ត្រឡប់ទៅកាន់មាតុភូមិយើងវិញ។

កាលពីថ្ងៃទី២៩ សីហា និស្សិតកសិកម្មកម្ពុជាចំនួន ២០០នាក់ បានទទួលសញ្ញាបត្រ ក្រោយបញ្ចប់វគ្គបណ្ដុះបណ្ដាលបច្ចេកទេសកសិកម្មរយៈពេល ១១ខែ នៅអ៊ីស្រាអែល។ ក្នុងពិធីចែកសញ្ញាបត្រខាងលើ មានវត្តមានលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងឧបនាយរដ្ឋមន្រ្តីអ៊ូហ្គាន់ដា និងរដ្ឋមន្រ្តីក្រសួងកសិកម្មមកពីបណ្តាប្រទេសក្នុងទ្វីបអាហ្វ្រិកមួយចំនួនទៀត។

ក្នុងពិធីចែកសញ្ញាបត្រដល់និស្សិតកសិកម្មកម្ពុជានៅអ៊ីស្រាអែល លោក វេង សាខុន បានអរគុណក្រុមហ៊ុន AgroStudies ដែលផ្តល់កិច្ចសហប្រតិបត្តិការយ៉ាងល្អជាមួយសាកលវិទ្យាល័យភូមិន្ទកសិកម្ម ក្នុងការអភិវឌ្ឍធនធានមនុស្សតាមរយៈការទទួលយកនិស្សិតឆ្នាំទី៣ មកពីតាមបណ្តាសាកលវិទ្យាល័យ និងវិទ្យាស្ថានជាតិកសិកម្មនៅទូទាំងប្រទេសមកហាត់ការនៅអ៊ីស្រាអែល។ រដ្ឋមន្រ្តីកសិកម្មកម្ពុជា សង្ឃឹមថាកិច្ចសហប្រតិបត្តិការនេះ នឹងត្រូវបានពង្រឹង និងពង្រីកឲ្យកាន់តែល្អប្រសើរ និងឈានឡើងជាលំដាប់។

និស្សិតកសិកម្ម_កម្ពុជា នៅ_ក្នុង_ពិធីចែកសញ្ញាបត្រនៅអ៊ីស្រាល កាលពីថ្ងៃទី២៩ សីហា

ថ្លែងក្នុងពិធីចែកសញ្ញាបត្រខាងលើ លោក វេង សាខុន បានណែនាំដល់និស្សិតដូច្នេះ៖«និស្សិតគ្រប់រូបត្រូវនាំយកចំណេះដឹង និងបទពិសោធន៍ល្អៗ ត្រឡប់ទៅកាន់មាតុភូមិយើងវិញ ដើម្បីនាំគ្នាចូលរួមទាំងកាយ ចិត្ត និងចំណេះដឹងបច្ចេកទេសកសិកម្មល្អៗទៅកសាង និងអភិវឌ្ឍប្រទេសយើងឲ្យមានការរីកចម្រើន សម្បូរសប្បាយ ពិសេសអភិវឌ្ឍវិស័យកសិកម្មកម្ពុជាជាជំហានៗប្រកបដោយចីរភាព និរន្តរភាព មានលក្ខណប្រកួតប្រជែង បរិយាប័ន្ន ធន់នឹងការប្រប្រួលអាកាសធាតុ និងនរវានុវត្តន៍»។

សូមបញ្ជាក់ថា និស្សិតកសិកម្មកម្ពុជា បានចុះហាត់ការនៅក្នុងមន្ទីរពិសោធន៍ រោងចក្រកែច្នៃ ចម្ការបន្លែ ផ្លែឈើ ពូជដំណាំ ថ្នាលពិសោធន៍ កសិដ្ឋានគោទឹកដោះ និងផ្កា ដែលប្រើប្រាស់បច្ចេកវិទ្យាទំនើបៗរបស់រដ្ឋអ៊ីស្រាអែលក្នុងរយ:ពេល ១១ខែ(២០២១-២០២២)។ គិតមកដល់ឆ្នាំសិក្សា២០២១-២០២២ AgroStudies បានបណ្តុះបណ្តាលនិស្សិតកម្ពុជាចំនួន ១ ៤៦៩នាក់រួចហើយ ដែលបានចាប់ផ្ដើមតាំងពីឆ្នាំ២០០៨មក៕