ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ បានឱ្យដឹងថា ម៉ាស៊ីនផលិតអុកស៊ីសែនចំនួន៣ គឺជាជំនួយរបស់លោក ហ៊ុន ម៉ាណែត ដែលផ្តល់ជូនមន្ទីរពេទ្យបង្អែកខេត្តសៀមរាប អំឡុងពេលជំងឺកូវីដ១៩ រាតត្បាតខ្លាំង និងមានតម្រូវការអុកស៊ីសែនច្រើន។ លោកបញ្ជាក់ថា ម៉ាស៊ីននេះមានលទ្ធភាពផលិតអុកស៊ីសែនចំនួន១៦ដប ក្នុងរយៈពេលកន្លះម៉ោង ឬស្មើនឹង ៣២ដប ក្នុងមួយម៉ោង។ 

 

«យើងមានអុកស៊ីសែនអត់ខ្វះទេក្នុងពេទ្យនេះ ក្រៅពីនោះយើងបានចែកចាយទៅពេទ្យស្រុក មណ្ឌលសុខភាពណាដែលត្រូវការ គឺមកយកទៅទាំងអស់ មិនមានលក់ដូរទេ ពីមុនអុកស៊ីសែនទាល់តែយើងកម្ម៉ង់តាមក្រុមហ៊ុនយកពីភ្នំពេញ មួយរយៈយើងមានបញ្ហាកូវីដនេះ វេទនាអារឿងអុកស៊ីសែនហ្នឹង មួយថ្ងៃមានតម្រូវការ១០០ទៅ២០០ដប ពេលមានម៉ាស៊ីនកាន់បន្ថយច្រើន»។

 

ដោយមានលទ្ធភាពផលិតបានច្រើនដបក្នុងមួយម៉ោង ទើបក្នុងមួយថ្ងៃអ្នកកាន់ម៉ាស៊ីនបញ្ឆេះម៉ាស៊ីនដើម្បីផលិតអុកស៊ីសែនតែ២ទៅ៣ម៉ោងតែប៉ុណ្ណោះ។ នេះជាការបញ្ជាក់ពីលោក ក្រុស សារ៉ាត់។

 

ក្រៅពីម៉ាស៊ីនខ្នាតធំទាំង៣ខាងលើនេះ ថ្មីៗនេះ ប្រទេសជប៉ុនក៏បានផ្តល់ជំនួយម៉ាស៊ីនមួយគ្រឿងទៀតសម្រាប់ផលិតអុកស៊ីសែន ដល់ការប្រើប្រាស់ក្នុងមន្ទីរពេទ្យបង្អែកខេត្តសៀមរាបផងដែរ។ ម៉ាស៊ីននេះអាចផលិតអុកស៊ីសែន ២ដប ក្នុងមួយម៉ោង ដោយត្រូវបានដំឡើងតាមកម្រិតស្ដង់ដាពីក្រុមអ្នកជំនាញ៕