ជាតិ
ក្រសួងទេសចរណ៍រំពឹងថា នៅឆ្នាំ២០២២នេះ ភ្ញៀវទេសចរអន្តរជាតិកើនដល់២លាននាក់ ក្រសួងទេសចរណ៍ រំពឹងថាភ្ញៀវអន្តរជាតិនឹងកើតដល់ ២លាននាក់ក្នុងឆ្នាំ២០២២នេះ(រូបភាពពី៖ ក្រសួងទេសចរណ៍)
×
ដោយ៖ ហេង ស្រីលីន
ភ្នំពេញ៖ កម្ពុជាអាចនឹងទទួលភ្ញៀវអន្តរជាតិពី ១,៥ ទៅ២លាននាក់ ក្នុងឆ្នាំ២០២២នេះ ខណៈរយៈពេលត្រឹម ៨ខែកម្ពុជាទទួលបានភ្ញៀបអន្តរជាតិជិត ១លាននាក់។ នេះបើតាមការព្យាករណ៍ចុងក្រោយរបស់ក្រសួងទេសចរណ៍។
យោងតាមរបាយការណ៍ក្រសួងទេសចរណ៍ ពីខែមករា ដល់ខែសីហា ឆ្នាំ២០២២ ទេសចរអន្តរជាតិដែលចូលមកទស្សនាកម្ពុជាសរុបចំនួន ៩៩៨ ២៧២នាក់ កើនឡើង ៧២០ភាគរយ បើធៀបរយៈពេលដូចគ្នាក្នុងឆ្នាំ២០២១ ។ ក្នុងនោះផ្លូវអាកាសទទួលបានភ្ញៀវអន្តរជាតិចំនួន ៣៩៦ ៥៩១នាក់ កើនឡើង ៥៩៥ភាគរយ។ ចំណែកផ្លូវគោក និងផ្លូវទឹកទទួលបានភ្ញៀវអន្តរជាតិចំនួន ៦០១ ៦៨១នាក់ កើនឡើង ៨៣១ភាគរយ ធៀបរយៈពេលដូចគ្នាឆ្នាំ២០២១។
លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា៖ « «យោងតាមការព្យាករណ៍ចុងក្រោយក្នុងឆ្នាំ២០២២នេះ កម្ពុជាអាចនឹងទទួលបានទេសចរអន្តរជាតិចាប់ពី១.៥លាននាក់ទៅ២លាននាក់»។
រដ្ឋមន្រ្តីរូបនេះ បន្ថែមថា ភ្ញៀវទេសចរអន្តរជាតិ ដែលមកកម្សន្តនៅកម្ពុជា ភាគច្រើនមកពី ប្រទេសថៃ វៀតណាម ចិន សហរដ្ឋអាម៉េរិក ឥណ្ឌូណេស៊ី បារាំង កូរ៉េខាងត្បូង ម៉ាឡេស៊ី អង់គ្លេស និងប្រទេសឡាវ។
សូមបញ្ជាក់ដែរថា រយៈពេល ៨ខែឆ្នាំ២០២២នេះ កម្ពុជាមានទេសចរផ្ទៃក្នុងប្រមាណ ៨លាន៥០ម៉ឺននាក់ កើនឡើង ២៤៥ភាគរយ។ ក្នុងនោះទេសចរជាតិមានជាង៧.៦លាននាក់ កើនឡើង ២២៦ភាគរយ និងទេសចរបរទេសផ្ទៃក្នុងជាង៨៧ម៉ឺននាក់ កើនឡើង ២៥៣ភាគរយ បើធៀបរយៈពេលដូចគ្នាឆ្នាំ២០២១៕
Tag:
ThmeyThmey
ក្រសួងទេសចរណ៍
ភ្ញៀវទេសចរ
© រក្សាសិទ្ធិដោយ thmeythmey.com