សហព័ន្ធកីឡាវាយកូនបាល់កម្ពុជាបានបញ្ជូនកីឡាករ៣រូប និងកីឡាការិនី៣រូប ចេញទៅហ្វឹកហាត់រយៈពេលវែងនៅសហរដ្ឋអាម៉េរិក ដើម្បីពង្រឹងសមត្ថភាពត្រៀមដំណើរមកដល់នៃព្រឹត្តិការណ៍ប្រវត្តិសាស្រ្តនៅកម្ពុជានាឆ្នាំ២០២៣ ខាងមុខ។ សម្រាប់កីឡាករ-កីឡាការិនី នៅក្នុងស្រុកវិញក៏មានការហ្វឹកយ៉ាងយកចិត្តទុកដាក់ និងខ្លាំងក្លាដែរពោលគឺមានឆន្ទៈខ្ពស់សម្រាប់ក្រុមជម្រើសជាតិកម្ពុជា។

 

ជាមួយនឹងការត្រៀមខ្លួននេះដែរ គ្រូបង្វឹកក្រុមកីឡាវាយកូនបាល់ជម្រើសជាតិកម្ពុជា ហាក់ស្ទាក់ស្ទើមិនហ៊ានអារកាត់ថាអាចដណ្តើមបានមេដាយឡើយ ដោយរង់ចាំមើលជាក់ស្តែងនៅពេលប្រកួត។
 

លោកជា ពៅ រៀបរាប់ថា៖«ខ្ញុំជាគ្រូ ខ្ញុំចេះតែមានក្តីសង្ឃឹមហើយ ប៉ុន្តែដល់ឃើញជាក់ស្តែងយើងមិនទាន់អាចអារកាត់បានទេថាកីឡាឈ្នះឬចាញ់។ យើងមើលមិនឃើញ យើងសង្ឃឹមពេកវាអាចហួសពីសមត្ថភាពរបស់យើង»។

 

បន្ទាប់ពីឆ្លងកាត់ការចេញទៅហ្វឹកហាត់ និងការប្រកួតនៅក្រៅស្រុកច្រើនលោក ជា ពៅ មើលឃើញពីគុណផលនៃក្រុមកីឡាករ-កីឡាការិនីមានការវិវឌ្ឍន៍ច្រើន។ កន្លងមកលោកសង្កេតឃើញថាមានភាពលូតលាស់ច្រើនបើធៀបនឹងប្រទេសក្នុងតំបន់អាស៊ាន គឺមានសមត្ថភាពប្រហាក់ប្រហែលគ្នា។

 

«ផុតពីកូវីដហ្នឹងទៅយើងបានហាត់ និងមានការប្រកួតច្រើន ហើយឃើញកម្រិតបច្ចេកទេសពួកគាត់ឡើងច្រើន ការលេង និយាយទៅកម្លាំងកាយចិត្តគាត់ឡើងមួយចប់។ ការហ្វឹកហាត់របស់គាត់ល្អទាំងអស់វិន័យ»។ លោក ជា ពៅ បន្ថែមដូច្នេះ។

 

សូមបញ្ជាក់ថា សម្រាប់កីឡាវាយកូនបាល់មានកីឡាករ ៥រូប កីឡាការិនី៥រូប និងគ្រូ២រូប ត្រៀមសម្រាប់ប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕