ស្របពេលព្រឹត្តិការណ៍កីឡាស៊ីហ្គេមលើកទី៣២ ខិតជិតមកដល់ សហព័ន្ធកីឡាសីដក់ និងឈិនឡូនកម្ពុជាបន្តខ្នះខ្នែងក្នុងការហ្វឹកហ្វឺនកីឡាករ-កីឡាការិនី យ៉ាងខ្លាំងក្លាដើម្បីសម្រេចផែនការយុទ្ធសាស្រ្តដណ្តើមមេដាយយ៉ាងហោចណាស់មាស៣ នាស៊ីហ្គេមនៅកម្ពុជា។

 

កីឡាការិនីជម្រើសជាតិកម្ពុជា ផូ បញ្ញា សមាជិកក្រុមកីឡាសីដក់ និងឈិនឡូនកម្ពុជាបានផ្តល់បទសម្ភាសផ្ទាល់ដល់សារព័ត៌មានថ្មីៗអំពីការត្រៀមខ្លួនប្រជែងយកមេដាយជូនជាតិ នាព្រឹត្តិការណ៍ស៊ីហ្គេម ឆ្នាំ២០២៣។

កីឡាការិនី ផូ បញ្ញា និយាយដោយមានភាពជឿជាក់ថា៖«ខ្ញុំបានត្រៀមខ្លួនរួចរាល់ហើយក្នុងការចូលរួមព្រឹត្តិការណ៍ស៊ីហ្គេម២០២៣ ដែលកម្ពុជាយើងធ្វើម្ចាស់ផ្ទះ ខ្ញុំព្យាយាមហ្វឹកហាត់ដើម្បីដណ្តើមមេដាយជូនជាតិ»។ 
 

ជាមួយនឹងក្តីរំពឹងខ្ពស់នេះដែរកីឡាការិនីជម្រើសជាតិរូបនេះបញ្ជាក់ថា សម្រាប់ក្រុមកីឡាសីដក់ និងឈិនឡូនកម្ពុជាមានការហ្វឹកហ្វឺនខ្លាំង ដោយមួយថ្ងៃហ្វឹកហាត់៣ពេល។ ទោះមានការពិបាកខ្លាំងតែកីឡាការិនី ផូ បញ្ញា ប្តេជ្ញាព្យាយាមប្រឹងប្រែងហ្វឹកហាត់ខ្លាំងដើម្បីកីឡាសីដក់កម្ពុជា៕