ក្នុងបេសកកម្ម​ចុះបង្ក្រាបបទល្មើសនេសាទខុសច្បាប់នៅភូមិសាស្ត្រភូមិកំពង់អុស និងភូមិដងគោម ឃុំកំពង់អុស ស្រុកពញាឮ កាលថ្ងៃទី១៩ ខែកញ្ញា លោក ហេង សុភារិទ្ធិ នាយខណ្ឌរដ្ឋបាលជលផលខេត្តកណ្ដាល ​លើកឡើងថា៖«ផលត្រីឆ្នាំនេះ ខ្ញុំជឿថាកើន។ មិនមែនកើនតែចំនួនត្រីទេ គុណភាព​ក៏​ល្អ។ ដោយសារឆ្នាំនេះ ទឹកមានតាំងពីដើមឆ្នាំ»។ 


រូបភាពពីរដ្ឋបាលស្រុកពញាឮ
 

បើតាមហ្វេសប៊ុកផេករដ្ឋបាលខេត្តកណ្ដាល ក្នុង​បេសកកម្មចុះបង្រ្កាបសៃយ៉ឺនស្បៃមុងខាងលើ​ លោក ហេង សុភារិទ្ធិ សង្កេតឃើញមានកូនត្រីចម្រុះជាច្រើនប្រភេទ ដោយក្នុងមួយសៃយ៉ឺនស្បៃមុងមានកូនត្រីចម្រុះពី៣០ ទៅ៥០ គីឡូក្រាម។ នាប្រតិបត្តិការចុះបង្ក្រាប នាយខណ្ឌរដ្ឋបាលជលផលខេត្តកណ្ដាលរូបនេះ ក៏​បាន​អំពាវនាវឱ្យប្រជានេសាទទាំងអស់ ត្រូវប្រគល់​ឧបករណ៍នេសាទខុសច្បាប់ជូនអាជ្ញាធរមានសមត្ថកិច្ច។
 

ការ​ប្រគល់​​ឧបករណ៍នេសាទខុសច្បាប់ជូនអាជ្ញាធរមានសមត្ថកិច្ចនេះ លោក ហេង សុភារិទ្ធិ អះអាងថា​ដើម្បីចូលរួមទប់ស្កាត់បទល្មើសជលផល ដែលអាចធ្វើឱ្យទិន្នផលត្រីនៅក្នុងខេត្តកណ្ដាលមាននិរន្តរភាព។ គួរ​បញ្ជាក់ថា ក្នុងការចុះបង្ក្រាបបទល្មើសនេសាទ ក្នុងភូមិកំពង់អុស និងភូមិដងគោម ឃុំកំពង់អុស ស្រុកពញាឮ ក្រុមការងារបានបង្ក្រាប សៃយ៉ឺនស្បៃមុង ចំនួន៥៥, មាត់លូ របាំងព្រោះស្បៃមុងប្រវែង ៤,២០០ម៉ែត្រ, បង្គោលតូចធំ ចំនួន ១,៤០០ដើម និងបានចាក់លែងកូនត្រីចម្រុះ ប្រមាណ ១៥០គីឡូក្រាម។ នេះបើតាម​ហ្វេសប៊ុកផេករដ្ឋបាលខេត្តកណ្ដាលខាងលើ៕​