អន្តរជាតិ
ថៃ ចុះកិច្ចព្រមព្រៀងទិញដ្រូនតម្លៃ១០០លានដុល្លារពីអ៊ីស្រាអែល ដ្រូន Hermes 900 របស់ក្រុមហ៊ុនអ៊ីស្រាអែល Elbit ។ រូបថតពីក្រុមហ៊ុន Elbit
× កងទ័ពជើងទឹកថៃ បានចុះកុងត្រាទិញដ្រូនប្រភេទ Hermes ពីក្រុមហ៊ុនអ៊ីស្រាអែលក្នុងតម្លៃ ១០៧,៦៧លានដុល្លារ។ ការបញ្ជាទិញនេះ ត្រូវមើលឃើញពីការបន្តពង្រឹងកម្លាំងយោធារបស់ក្រុងបាងកក។
ក្នុងសេចក្ដីថ្លែងការណ៍មួយដែលចេញផ្សាយនៅថ្ងៃទី២១ ខែកញ្ញា កងទ័ពជើងទឹកថៃ បញ្ជាក់ថា ខ្លួននឹងបញ្ជាទិញដ្រូនប្រភេទ Hermes 900 ពីក្រុមហ៊ុនអេឡិចត្រូនិកការពារជាតិអ៊ីស្រាអែល Elbit Systems ក្នុងទឹកប្រាក់១០៧,៦៧លានដុល្លារ។ យ៉ាងណាមិញ កងទ័ពជើងទឹកថៃមិនបានបញ្ជាក់ពីចំនួននោះឡើយ។ ទឹកប្រាក់ទាំងនេះ នឹងត្រូវចំណាយទិញប្រព័ន្ធដ្រូននេះក្នុងរយៈពេលបួនឆ្នាំចន្លោះឆ្នាំ២០២២ ដល់ឆ្នាំ ២០២៥។
សេចក្ដីថ្លែងការណ៍ដដែលនោះបានបន្តថា ដ្រូនទាំងនោះនឹងត្រូវបានប្រើប្រាស់សម្រាប់ការល្បាតនៅតាមសមុទ្រដើម្បីការពារអធិបតេយ្យភាពដែនសមុទ្រ ផ្លូវដឹកជញ្ជូន និងសម្រួលប្រតិបត្តិការតាមសមុទ្រផងដែរ។
បើយោងតាមគេហទំព័ររបស់ក្រុមហ៊ុន ដ្រូនប្រភេទ Hermes 900 ជាប្រភេទយន្តហោះគ្មានមនុស្សបើកខ្នាតមធ្យមដែលមានភាពធន់ក្នុងការហោះហើរលើសពី៣៦ម៉ោង និងចម្ងាយរហូតដល់៩,១៤៤ម៉ែត្រ ហើយអាចផ្ទុកទម្ងន់អតិបរមា៣៥០គីឡូក្រាម។ ប្រព័ន្ធដ្រូនប្រភេទនេះត្រូវបានប្រើប្រាស់នៅក្នុងប្រទេសជាច្រើនដូចជា ហ្វីលីពីន ស្វ៊ីស សហភាពអ៊ឺរ៉ុប និងកាណាដា។
កាលពីឆ្នាំ២០១៧ កងទ័ពថៃបានទិញយន្តហោះដ្រូន Hermes 450 របស់ក្រុមហ៊ុន Elbit Systems ផងដែរ៕
© រក្សាសិទ្ធិដោយ thmeythmey.com