ប្រធានមន្ទីរពេទ្យបង្អែកខេត្តសៀមរាប លោកវេជ្ជបណ្ឌិត ប៉ែន ផលគុណ លើកឡើងថា អ្នកស្ម័គ្រចិត្តបរិច្ចាគឈាមជាក្រុម ចាប់ផ្តើមមានសកម្មភាពឡើងវិញ ក្រោយស្ងប់ស្ងាត់ជំងឺកូវីដ១៩។ លោកថា កំឡុងពេលកូវីដរាតត្បាតខ្លាំង បរិមាណអ្នកបរិច្ចាគឈាម មានការធ្លាក់ចុះ ដោយសារអង្គភាព ក្រុមហ៊ុន សណ្ឋាគារក្នុងខេត្តបានផ្អាកអាជីវកម្ម ដែលភាគច្រើនឈាមដែលទទួល បានពីក្រុមគ្រួសារអ្នកជំងឺ ឬហៅថាការបរិច្ចាគជួស។

 

លោកវេជ្ជបណ្ឌិត ប៉ែន ផលគុណ រីករាយចំពោះការចូលរួមរបស់វិស័យឯកជន តែលោកក៏ចង់ឱ្យមានសន្ទុះអ្នកស្ម័គ្រចិត្តបរិច្ចាគឈាមជាប្រចាំថ្ងៃភាគច្រើនផងដែរ។ លោកពន្យល់ថា ឈាមមានអាយុកាលកំណត់សម្រាប់ប្រើប្រាស់ ដូច្នេះការផ្តល់ច្រើននៅពេលតែមួយនោះ ក៏មិនសូវប្រសើរប៉ុន្មានដែរ។ លោកវេជ្ជបណ្ឌិត ប៉ែន ផលគុណ៖« អ្វីដែលចង់បាន គឺជាការបរិច្ចាគរាល់ថ្ងៃ ព្រោះឈាមមានអាយុកាលរបស់វា។ ឧទាហរណ៍បើគាត់មកបរិច្ចាគមួយពាន់(ផ្លោក) ក្នុងមួយថ្ងៃ អត់សូវមានន័យដែរ ព្រោះវាមានរយៈពេលខ្លីក្នុងការប្រើប្រាស់ ចង់ឱ្យអ្នកមានសុខភាពល្អ មកបរិច្ចាគរាល់ថ្ងៃ ដើម្បីប្រើប្រាស់បានជាហូរហែ មាននិរន្តរភាព និងកាត់បន្ថយសាច់ញាតិបរិច្ចាគជួស ព្រោះខ្លះមិនបានត្រៀម មិនបានគិតគូរពីបញ្ហាសុខភាពជាមុន»។

 

មន្ទីរពេទ្យបង្អែកខេត្តសៀមរាប មានវឌ្ឍនភាពការងារល្អប្រសើរនារយៈពេល១០ឆ្នាំចុងក្រោយ និងក្លាយជាមន្ទីរពេទ្យថ្នាក់តំបន់ ហើយមជ្ឈមណ្ឌលផ្តល់ឈាមមានតួនាទីសំខាន់មួយផ្នែកសម្រាប់ការរុញវឌ្ឍនភាពការងារទាំងមូល។ យ៉ាងណា ប្រធានមន្ទីរពេទ្យបង្អែកខេត្ត លោក ប៉ែន ផលគុណ ចង់ឱ្យមានការចូលរួមបន្ថែមទៀតសម្រាប់អ្នកស្ម័គ្រចិត្តបរិច្ចាគឈាម ខណៈសព្វថ្ងៃបរិមាណត្រូវបានមើលឃើញថា នៅកម្រិតទាបនៅឡើយ។ 

 

«មានតែ៤៥ភាគរយប៉ុណ្ណោះដែលជាឈាមបានមកពីអ្នកបរិច្ចាគស្ម័គ្រចិត្ត នៅតែ៥០ភាគរយជាងទទួលបានពីក្រុមគ្រួសាររងគ្រោះ ដែលជាការបរិច្ចាគជួស។ ចំណុចនេះនៅតែមិនល្អ បើធៀបនឹងប្រទេសជិតខាង ឬប្រទេសអភិវឌ្ឍន៍ គេទទួលបានពីអ្នកស្ម័គ្រចិត្តដល់ទៅ៩០ភាគរយជាង ខ្លះ៩៩ ឬ១០០ភាគរយ»។ នេះជាការពន្យល់របស់លោកវេជ្ជបណ្ឌិត ប៉ែន ផលគុណ ដោយបន្ថែមថា គោលដៅរបស់ក្រសួង ក៏ដូចជាមជ្ឈមណ្ឌលជាតិផ្តល់ឈាម គឺធ្វើយ៉ាងណាបង្កើនចំនួនអ្នកមកបរិច្ចាគដោយស្ម័គ្រចិត្ត មិនមែនជាក្រុមគ្រួសារអ្នកជំងឺ ដើម្បីឱ្យមជ្ឈមណ្ឌលផ្គត់ផ្គង់ឈាម១០០ភាគរយ ដល់ផ្នែកសេវាសម្រាប់ជួយអ្នកជំងឺ។ តែលោកវេជ្ជបណ្ឌិតយល់ថា វាជាជំហានបន្ទាប់ក្នុងរយៈពេលយូរ។

មជ្ឈមណ្ឌលផ្តល់ឈាមក្នុងមន្ទីរពេទ្យបង្អែកខេត្តសៀមរាប ជាមជ្ឈមណ្ឌលដែលមានលក្ខណៈស្ដង់ដា និងឈានមុខគេក្នុងចំណោមមជ្ឈមណ្ឌលផ្តល់ឈាមចំនួន៥ ក្នុងប្រទេសកម្ពុជា។ អាគារមជ្ឈមណ្ឌលនេះ ជាជំនួយពីស្ថានទូតអាមេរិកប្រចាំកម្ពុជា និងបំពាក់គ្រឿងបរិក្ខាបច្ចេទេសស្ដង់ដាពីមជ្ឈមណ្ឌលជាតិផ្តល់ឈាម និងការគាំទ្របច្ចេកទេសពីកាកបាទក្រហមអូស្រ្ដាលី។ មជ្ឈមណ្ឌលនេះ ក៏ទទួលបានការបញ្ជាក់ថា បានផ្តល់ឈាមដែលមានសុវត្ថិភាពបំផុតសម្រាប់ចាក់បញ្ចូលដល់អ្នកជំងឺផងដែរ។

 

ប្រធានមជ្ឈមណ្ឌលផ្តល់ឈាមខេត្តសៀមរាប លោកស្រីវេជ្ជបណ្ឌិត ឆាយ គឹមឈន បានពន្យល់ពីដំណាក់នីមួយៗក្នុងមន្ទីរពិសោធន៍វិភាគរោគជំងឺឆ្លង ប្រព័ន្ធភាពសុំា និងលោហិតសាស្រ្ដ ទាំងការរៀបចំញែកគ្រាប់ឈាម ទុកដាក់ក្នុងទូត្រជាក់ និងវិភាគរកមេរោគជាដើម។ល។ លោកស្រីពន្យល់ថា មុនយកបញ្ចូលដល់អ្នកជំងឺ គឺមានការពិនិត្យត្រឹមត្រូវ និងហ្មត់ចត់បំផុត ដើម្បីធានាពីសុវត្ថិភាព។

 

តម្រូវការឈាមសម្រាប់ប្រើប្រាស់ជាមធ្យមក្នុងមន្ទីរពេទ្យបង្អែកខេត្ត ចន្លោះពី២០ ទៅ៣០ផ្លោក ហើយអ្នកជំងឺភាគច្រើន មានជំងឺហូរឈាមក្រពេះ គ្រោះថ្នាក់ចរាចរណ៍ និងស្រ្តីឆ្លងទន្លេ។ យ៉ាងណា ប្រធានមជ្ឈមណ្ឌលផ្តល់ឈាមខេត្តសៀមរាប ជឿថា បរិមាណនេះនឹងកើនឡើង ក្រោយពេលអាគារថ្មីដែលមានឯកទេសវះកាត់ជំងឺធ្ងន់ៗរួចរាល់ គឺអាចមានជំងឺធ្ងន់កាន់តែច្រើន បញ្ជូនមកមន្ទីរពេទ្យពីបណ្ដាខេត្តជុំវិញខេត្តសៀមរាប៕