ក្រុមការពារតំណែងជើងឯក Man City បានបង្ហាញភាពខ្លាំងរបស់ខ្លួន ដោយរកបានដល់ទៅ៤គ្រាប់នៅត្រឹមវគ្គទី១ ក្នុងជំនួប Manchester Derby។ Foden ជាអ្នករកបានគ្រាប់នាំមុខដំបូងនៅ៨នាទីដំបូងនៃវគ្គទី១ មុនពេល Haaland សម្រេចបាន២គ្រាប់តាមក្រោយ។ មុនបញ្ចប់វគ្គទី១ Foden បន្ថែមគ្រាប់ទី២របស់ខ្លួននៅនាទី៤៤។
 

ចូលដល់វគ្គទី២ ត្រឹមនាទី៥៦ Antony Santos រកបាន១គ្រាប់ឱ្យ Man Utd មុនពេលខ្សែប្រយុទ្ធន័រវែស Haaland បន្ថែមគ្រាប់ទី៣នៅនាទី៦៤ មុនរូបគេបញ្ជូនបាល់ឱ្យដៃគូ Foden ខ្សែបម្រើសញ្ជាតិអង់គ្លេសដើម្បីសម្រេចគ្រាប់ទី៣នៅ៩នាទីបន្ទាប់ ដើម្បីជួយក្រុមមេឃខៀវនាំមុខក្រុមបិសាចក្រហម ៦-០។
 

Anthony Martial ដែលប្តូរចូលជំនួស Marcus Rashford រកបាន២គ្រាប់ម្នាក់ឯងនៅនាទី៨៤ និង៩០+១។ ចប់ការប្រកួតក្រុមលោក Pep Guardiola ឈ្នះក្រុមលោក Erik ten Hag ៦-៣។

ជ័យជម្នះនេះ បានជួយក្រុម Man City នៅរក្សាចំណាត់ថ្នាក់ទី២ដដែល ដោយរកបាន២០ពិន្ទុ តាមពីក្រោយក្រុមកំពូលតារាង Arsenal ដែលឈរកំពូលតារាងចំនួន១ពិន្ទុ។ Man Utd ធ្លាក់ទៅលេខ៦ មាន១២ពិន្ទុ ខណៈ Chelsea ដែលឈ្នះ Crystal Palace ២-១ ឡើងទៅលេខ៥វិញ។ Tottenham Hotspur នៅលេខ៣មាន១៧ពិន្ទុ ឯ Brighton & Hove Albion នៅលេខ៤មាន១៤ពិន្ទុ។
 

សម្រាប់ Haaland ក្រោយរកបាន៣គ្រាប់បន្ថែមនៅជំនួបលីគសប្តាហ៍ទី៨របស់ខ្លួន បានធ្វើឱ្យរូបគេមានកំណត់ត្រាថ្មី ដោយក្លាយជាកីឡាករដំបូងដែលធ្វើបាន hat-trick ២លើក ក្នុងចំណោម៣ប្រកួតដំបូងនៅទឹកដីខ្លួនឯង។ Haaland មកទល់ពេលនេះរកបាន១៤គ្រាប់ហើយ និងកំពុងនាំមុខគេក្នុងតារាងអ្នកគ្រាប់ច្រើនជាងគេនៅ Premier League ដោយនាំមុខ Harry Kane របស់ Spurs ដែលរកបាន៧គ្រាប់ Aleksandar Mitrovic ខ្សែប្រយុទ្ធ Fulham ដែលរកបាន៦គ្រាប់៕