ជាតិ
សម្ដេច ហ៊ុន សែន នាយករដ្ឋមន្រ្តីកម្ពុជា។ រូបភាពពី SPM
×![]()
ភ្នំពេញ៖ សម្ដេច ហ៊ុន សែន បានដាស់តឿនដល់ឪពុកម្ដាយដែលមានលទ្ធភាព ត្រូវខិតខំជំរុញឱ្យកូនរៀនសូត្រ។ សម្ដេច បន្តថា ចំណេះដឹងគឺជាទ្រព្យសម្បត្តិរយៈពេលវែង ដែលមិនមាននរណាម្នាក់អាចលួចបាននោះទេ។
ថ្លែងក្នុងពិធីចែកសញ្ញាបត្រដល់និស្សិតនៃវិទ្យាស្ថានវ៉ាន់ដា នៅព្រឹកថ្ងៃទី៣ តុលានេះ សម្ដេចនាយករដ្ឋមន្រ្តីបានលើកឡើងពីការផ្ដល់ការអប់រំដល់កូន ដែលជាទ្រព្យសម្បត្តិរយៈពេលវែង។ «មិនប្រាកដទេ ការចែកលុយ ចែកទ្រព្យសម្បត្តិឱ្យកូនៗ នៅគង់វង្ស។ ប៉ុន្តែការចែកចំណេះដឹង ទើបជាមូលដ្ឋាន»។ នេះជាប្រសាសន៍របស់សម្ដេច ហ៊ុន សែន ដោយសម្ដេចបន្តលើកពីសុភាសិតខ្មែរថា កណ្ដៀរក៏មិនកោរ កណ្ដុរក៏មិនកាត់ ភ្លើងក៏មិនឆេះបានដែរ។
ក្នុងន័យនេះ សម្ដេច ហ៊ុន សែន ចង់ឱ្យឪពុកម្ដាយដែលមានលទ្ធភាព ត្រូវខិតខំជំរុញឱ្យកូនបានសិក្សារៀនសូត្រ តាមមធ្យោបាយណាក៏ដោយ។ បើតាមសម្ដេច នាពេលកន្លងមករដ្ឋាភិបាលបានដាក់ចេញនូវគោលនយោបាយរៀបចំសាលារៀននៅទីជនបទ ដែលបង្កើតឱកាសដល់កុមារនៅទីជនបទងាយស្រួលធ្វើដំណើរទៅរៀនសូត្រ។
ពាក់ព័ន្ធនឹងការកសាងធនធានមនុស្សវិញ សម្ដេច ហ៊ុន សែន បញ្ជាក់ថា រដ្ឋាភិបាល បានផ្ដល់ឱកាសឱ្យក្រសួងអប់រំ យុវជន និងកីឡា និងក្រសួងសុខាភិបាល ក្នុងការជ្រើសរើសមន្រ្តីរាជការចូលបម្រើការច្រើនជាងគេ៕
Tag:
អប់រំ
សម្ដេច
© រក្សាសិទ្ធិដោយ thmeythmey.com
