ធ្លាប់ផ្អាកសិក្សា៥ឆ្នាំ ធ្លាប់មើលកូនឱ្យគេ និងជាអ្នកអនាម័យ នូ សំណាង តស៊ូរហូតរៀនចប់មហាវិទ្យាល័យ

ជាតិ

ធ្លាប់ផ្អាកសិក្សា៥ឆ្នាំ ធ្លាប់មើលកូនឱ្យគេ និងជាអ្នកអនាម័យ នូ សំណាង តស៊ូរហូតរៀនចប់មហាវិទ្យាល័យ

04, Oct 2022 , 11:27 am

រូបភាព

យុវជន នូ សំណាង ស្ថិតនៅក្នុងឯកសណ្ឋានត្រៀមទទួលសញ្ញាបត្របរិញ្ញាបត្រ នៅថ្ងៃទី៩តុលា ឆ្នាំ២០២២

ដោយ: ឈួន ឈីវអុីង

ពីយុវជនម្នាក់ដែលធ្លាប់ផ្អាកការសិក្សាត្រឹមថ្នាក់ទី៩អស់រយៈពេល៥ឆ្នាំដោយសារតែគ្រួសារក្រីក្រ និងជាប់បំណុល ពេលនេះ យុវជន នូ សំណាងបានក្លាយជានិស្សិតបញ្ចប់ការសិក្សាថ្នាក់បរិញ្ញាបត្រលើជំនាញទំនាក់ទំនងអន្តរជាតិ។ទោះដឹងថា ដំណើរទៅមុខត្រូវជួបឧបសគ្គបន្ថែមទៀតក៏ដោយប៉ុន្តែយុវជនវ័យជិត៣០ឆ្នាំពីស្រុកកណ្តាលស្ទឹង ខេត្តកណ្តាលរូបនេះនៅតែបន្តដាក់គោលដៅសិក្សារបស់ខ្លួនដល់ថ្នាក់បរិញ្ញាបត្រជាន់ខ្ពស់។

ដើមឡើយ កត្តាជីវភាពបាននាំឲ្យ យុវជន សំណាងត្រូវបង្ខំចិត្តឈប់រៀននៅត្រឹមថ្នាក់ទី៩ហើយទៅចាប់រៀនជំនាញជួសជុលម៉ូតូ/រថយន្ត នៅរាជធានីភ្នំពេញតាមបំណងរបស់ឪពុកម្តាយ។ គេរំពឹងថា ជំនាញវិជ្ជាជីវៈនេះជួយឲ្យគេរកបានចំណូលផ្គត់ផ្គង់គ្រួសារនៅឯស្រុកកំណើត។

កាលពីអំឡុងខែមីនា ឆ្នាំ២០១០ សំណាងបានមកស្នាក់នៅអាស្រ័យជាមួយស្ត្រីម្នាក់នៅក្នុងខណ្ឌចំការមន ដែលឪពុករបស់ខ្លួនបានស្គាល់។ គោលបំណងគឺចង់ពឹងពាក់ឲ្យគាត់ជួយចាត់ចែង និងផ្តល់ឱកាសខ្លួនទៅធ្វើជាងជួសជុលម៉ូតូ/រថយន្ត។

អ្វីៗមិនដូចជាការគ្រោងទុកនោះឡើយ សំណាង បែរជាបង្ខំចិត្តធ្វើការងារផ្សេងក្រៅពីនេះ ហើយក៏មិនទទួលបានប្រាក់កម្រៃនោះដែរ។ «ពេលខ្ញុំឃើញអ៊ំម្ចាស់ផ្ទះឱ្យកូនទៅរៀនស្រាប់តែចង់ទៅរៀនដែរ ហើយ[ក៏]ភ្ញាក់ខ្លួនដឹងថា [ខ្ញុំ]គិតខុសហើយ។ ខ្ញុំនឹកស្រណោះខ្លួនមិនគួរចោលការសិក្សាឡើងមកទីក្រុងឡើយ»។ យុវជនសម្បុរស្រអែម និងសក់រួញអង្គាសដីរូបនេះបានរៀបរាប់ទាំងទឹកមុខស្រពោន។

ឆ្លៀតរៀនអង់គ្លេស កុំព្យូទ័រ និងចាប៉ី...

ព្រោះតែមានជំនក់ចិត្ត និងយល់ច្បាស់ពីតម្លៃនៃការសិក្សា សំណាង ក៏សម្រេចចិត្តសុំម្ចាស់ផ្ទះទៅរៀនភាសាអង់គ្លេសមួយម៉ោងក្នុងមួយថ្ងៃនៅអង្គការមួយក្បែរផ្ទះ។ លទ្ធផលសិក្សាបានផ្លែផ្កា ហើយបន្ទាប់មក សំណាង បានឆ្លៀតទៅរៀនកុំព្យូទ័រ និងចាប៉ី ដោយឥតគិតថ្លៃ នៅអង្គការមួយកន្លែងទៀត។

នូ សំណាង កំពុងសម្តែងចាប៉ី

ជាមួយសមត្ថភាព និងភាពប៉ិនប្រសប់ខាងវោហារសព្ទ សំណាង ទទួលបានឱកាសទៅសម្ដែងចាប៉ីនៅប្រទេសសិង្ហបុរី នាអំឡុងឆ្នាំ២០១៣ តាមរយៈអង្គការដែលខ្លួនបានរៀន។ ក្រោយត្រឡប់ពីការសម្តែងសិល្បៈវិញ សំណាងក៏រកបានការងារដំបូងសម្រាប់ជីវិតខ្លួន ដោយធ្វើជាអ្នកមើលកូនឱ្យជនបរទេសនៅគ្រួសារដែលទទួលប្រាក់៥៥ដុល្លារក្នុងមួយខែ។

ដោយសារតែមិនសូវមានពេលវេលាគ្រប់គ្រាន់ក្នុងការជួយកិច្ចការផ្ទះ និងបញ្ហាមួយចំនួន សំណាងបានសម្រេចចិត្តសុំម្ចាស់ផ្ទះទៅរស់នៅដោយឯករាជ្យខ្លួនឯង ហើយបន្តដើរតាមគោលដៅជីវិតខ្លួន។

អត្តា ហិ អត្តនោ នាថោ..

ខ្លួនទីពឹងខ្លួន..ជីវិតមិនងាយស្រួលនោះឡើយសម្រាប់អ្នកដែលកើតក្នុងគ្រួសារក្រីក្រដូចជាសំណាង។ ក្រោយការចាកចេញទៅរស់នៅតែម្នាក់ឯង យុវជនរូបនេះ បានទៅធ្វើជាអ្នកសម្អាតអនាម័យពេលយប់នៅក្នុងបារបារាំងមួយកន្លែងម្តុំមាត់ទន្លេ ដោយទទួលបានប្រាក់៩៥ដុល្លារក្នុង១ខែ។

ការងារពេលយប់ អនុញ្ញាតឱ្យសំណាង មានពេលកាន់តែច្រើនក្នុងការបន្តរៀនចាប៉ី ភាសាអង់គ្លេស រៀនកុំព្យូទ័រ។ ភាពក្លាហាន និងតស៊ូក្នុងជីវិត ពិសេសការខិតខំប្រឹងប្រែងរៀនសូត្ររបស់សំណាង ត្រូវបាននាយកអង្គការពង្រឹងយុវជនកម្ពុជាដែលបង្រៀនភាសាអង់គ្លេសនិងកុំព្យូទ័រមើលឃើញ ហើយផ្តល់ជំនួយឱ្យគេចូលរៀនសាលារដ្ឋឡើងវិញ។

«គ្រាន់តែឮអ៊ីចឹង!ខ្ញុំសប្បាយចិត្តដូចត្រូវឆ្នោត ដោយសារវាក្តីសុបិនជាយូរមកហើយ គ្រាន់តែយើងអត់មានអ្នកជួយជំរុញ និងគាំទ្ររឿងឯកសារចូលរៀន»។ សំណាងបានថ្លែងបែបនេះមកកាន់សារព័ត៌មានថ្មីៗ ទាំងក្តីរំភើប ដោយនឹកឃើញទិដ្ឋភាពពេលនាយកអង្គការផ្ដល់ឱកាសដ៏ធំនេះដល់ខ្លួន។

លើសពីឱកាសរៀនសូត្រឡើងវិញ សំណាង ក៏ត្រូវបានអ្នកគ្រប់គ្រងអង្គការឱ្យទៅធ្វើជំនួយកា រនិងជាអ្នកទទួលភ្ញៀវ នៅសាលាសិល្បៈតន្ត្រីខ្មែរអមតៈ ដែលគ្រប់គ្រងដោយ អង្គការពង្រឹងយុវជនកម្ពុជា ផងដែរ។

ចូលរៀនថ្នាក់ទី៩ឡើងវិញក្រោយខកខាន៥ឆ្នាំ

សំណាង បានចូលរៀនថ្នាក់ទី៩ឡើងវិញក្នុងនាមជាសិស្សស្វៃរិន។ ត្បិតមានឈ្មោះជាសិស្សរៀនក្រៅថ្នាក់ និង ឈប់រៀនអស់រយៈពេល៥ឆ្នាំមកហើយក្តីប៉ុន្តែលទ្ធផលនៃការប្រឡងថ្នាក់មធ្យមសិក្សាបឋមភូមិ (ឌីប្លូម) របស់យុវជនរូបនេះគឺជាប់ដោយទទួលបាននិទ្ទេសល្អបង្គួរ។ លទ្ធផលដ៏ល្អប្រសើរនេះបានតាមរយៈការព្យាយាមស្រាវជ្រាវមេរៀននានាដែលពាក់ព័ន្ធនឹងការប្រឡងលើប្រព័ន្ធអ៊ីនធឺណិតនិងការប្រឹងប្រែងរៀនសូត្រដោយខ្លួនឯងនៅផ្ទះ។

ប្រឡងជាប់ឌីប្លូមនៅឆ្នាំ២០១៥ បីឆ្នាំក្រោយមក សំណាង បានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) និទ្ទេស D តែក្នុងនាមសិស្សទូទៅ មិនមែនស្វៃរិននោះឡើយ។

យុវជនរូបនេះ បានរំលឹកថា៖ «ពេលកំពុងត្រៀមប្រឡងបាក់ឌុបខ្ញុំក៏ប្រឡងយកបានអាហារូបករណ៍រៀនភាសាអង់គ្លេសរយៈពេល៣ឆ្នាំនៅមជ្ឈមណ្ឌលអូស្ត្រាលីសម្រាប់ការបណ្ដុះបណ្ដាល (ACE) ផងដែរ»។

បន្ទាប់ពីប្រឡងជាប់បាក់ឌុប ស្ថិតក្នុងវ័យ២៦ឆ្នាំសំណាងត្រូវបានម្ចាស់អង្គការ បន្តជ្រោមជ្រែងឱ្យទៅបន្តការសិក្សាថ្នាក់បរិញ្ញាបត្រលើជំនាញទំនាក់ទំនងអន្តរជាតិ នៅសាលកវិទ្យាល័យអន្តរជាតិ ផារ៉ាហ្គន។

វិថីលើនៅឧត្តមសិក្សា..

ថ្ងៃទីមួយនៃការឈានចូលនៅមហាវិទ្យាល័យ សំណាងហាក់មានអារម្មណ៍ខ្មាស់គេព្រោះតែខ្លួនមានអាយុច្រើន។ ទោះថាមានកូនចិត្តបែបនេះក៏ពិតមែនប៉ុន្តែយុវជនមកពីខេត្តកណ្តាលមកនេះ នៅតែដាក់ចិត្តដាក់កាយខំរៀនសូត្រ។

សំណាងបានបញ្ជាក់យ៉ាងដូច្នេះ៖«ខ្ញុំខ្មាសគេដែរពេលទៅរៀននៅសាលាដែលមានសុទ្ធតែក្មេងៗស្លៀកពាក់ស្អាតបាតទាន់សម័យ ហើយសាលាក៏ទំនើបទៀត។តែខ្ញុំក៏មិនបានគិតច្រើនពីរឿងទាំងនេះដែរ ព្រោះខ្ញុំបានដាក់គោលដៅយ៉ាងមោះមុតថាទោះយ៉ាងណាក៏ខ្ញុំត្រូវខំរៀនឱ្យចប់ចុងចប់ដើម និងមិនបោះបង់ចោលទៀតទេ»។

ការតស៊ូរៀន៤ឆ្នាំនៅមហាវិទ្យាល័យរបស់ នូ សំណាង ត្រូវបានបញ្ចប់ដោយជោគជ័យ កាលពីខែកក្កដា ឆ្នាំ២០២២ ក្នុងវ័យ៣០ឆ្នាំ។ បច្ចុប្បន្នយុវជនរូបនេះ កំពុងបម្រើការងារនៅស្ថាប័នមួយ ដែលទទួលបានប្រាក់ខែសមរម្យ។ សំណាងបានបង្ហាញនូវមោទកភាពចំពោះខ្លួនឯង ដែលនាំកិត្តិយសជូនគ្រួសារនិងបានសម្រេចនូវគោលដៅរបស់ខ្លួនលើការសិក្សានេះ។

សំណាង បានអះអាងថា៖ «ការសិក្សាជារឿងសំខាន់បំផុត ហើយវាគ្មានឧបសគ្គណាអាចរារាំងនូវឆន្ទៈដែលខ្ញុំចង់រៀនសូត្រនេះបានឡើយ សូម្បីតែគ្មានលុយនិងមានអាយុច្រើនក៏ដោយ។ ខ្ញុំមានមោទកភាពខ្លួនឯងជាខ្លាំងដែលខ្ញុំសម្រេចចិត្តត្រឡប់មករៀនវិញ ហើយទទួលបានជោគជ័យបែបនេះ»។

ការរៀនចប់ថ្នាក់បរិញ្ញាបត្រ គឺជាទ្រព្យសម្បត្តិមហាសាល ព្រោះវាបានជួយយុវជនរូបនេះ ឱ្យមានជីវិតល្អប្រសើរឡើងហើយថែមទាំងមានចំណូលអាចជួយទំនុកបម្រុងជីវភាពគ្រួសារបានថែមទៀត។

បើតាមសំណាង ឆន្ទៈក្នុងការសិក្សានៅតែមានក្នុងចិត្តដោយលោកបានបំណងបន្តការសិក្សានៅថ្នាក់បរិញ្ញបត្រជាន់ខ្ពស់ (អនុបណ្ឌិត) នៅក្នុងពេលវេលាសមស្របណាមួយនាពេលអនាគត។ «ខ្ញុំមិនទាន់ស្កប់ស្កល់នឹងការសិក្សាឡើយ ទោះបីបច្ចុប្បន្នខ្ញុំមានអាយុច្រើនក៏ដោយ ព្រោះការសិក្សា ជាក្តីស្រមៃខ្ញុំ»៕