ជាតិ
«គ្រូបង្រៀនយើង អនាគតយើង ប្រទេសជាតិយើង» ! អ្នកគ្រូបង្រៀននៅក្នុងវិទ្យាល័យកំពង់ស្ពឺ
× ភ្នំពេញ៖ នៅថ្ងៃទី៥ តុលានេះ ក្រសួងអប់រំ យុវជន និងកីឡា នឹងរៀបចំប្រារព្ធពិធីអបអរសាទរទិវាគ្រូបង្រៀន ៥ តុលា នៅវិទ្យាស្ថានគរុកោសល្យរាជធានីភ្នំពេញ។ ទិវាគ្រូបង្រៀនឆ្នាំ២០២២នេះ ប្រារព្ធឡើងក្រោមប្រធានបទ «គ្រូបង្រៀនយើង អនាគតយើង ប្រទេសជាតិយើង»។
ក្នុងឆ្នាំ២០២២នេះ ក្រសួងអប់រំ យុវជន និងកីឡា នឹងរៀបចំប្រារព្ធពិធីអបអរសាទរទិវាគ្រូបង្រៀន ៥ តុលា ខួបលើកទី២៥ដោយផ្ទាល់ ក្រោមប្រធានបទ «គ្រូបង្រៀនយើង អនាគតយើង ប្រទេសជាតិយើង» នៅវិទ្យាស្ថានគរុកោសល្យរាជធានីភ្នំពេញ។ បើតាមសេចក្ដីប្រកាសព័ត៌មានរបស់ក្រសួងអប់រំ កម្មវិធីនេះ ប្រារព្ធទៅរយៈពេល១ថ្ងៃ ដោយមានការចូលរួមពីរដ្ឋមន្រ្តីក្រសួងអប់រំ, លោកគ្រូ អ្នកគ្រូ, អង្គការយូណេស្កូ, សមាគមគ្រឹះស្ថានឧត្តមសិក្សាកម្ពុជា និងតំណាងដៃគូអភិវឌ្ឍន៍ពាក់ព័ន្ធ។
ជាមួយគ្នានេះ ក្នុងកម្មវិធីនេះ ក៏មានបាឋកថារបស់លោក ហង់ជួន ណារ៉ុន រដ្ឋមន្រ្តីក្រសួងអប់រំ ស្ដីពី «ភាពជាអ្នកដឹកនាំសាលារៀន គឺជាគន្លឹះនៃកំណែទម្រង់សាលារៀន»។ លើសពីនេះ ក៏មានវេទិកាពិភាក្សាតុមូល ក្រោមប្រធានបទ «ការធ្វើបរិវត្តកម្មក្នុងវិស័យអប់រំ ដើម្បីសម្រេចគោលដៅអភិវឌ្ឍន៍ប្រកបដោយចីរភាព»ផងដែរ។
សូមបញ្ជាក់ថា ទិវាគ្រូបង្រៀន ៥ តុលា ជាទិវាមួយកើតឡើងក្រោមគំនិតផ្ដួចផ្ដើមរបស់សម្ដេច ហ៊ុន សែន នាយករដ្ឋមន្រ្តីកម្ពុជា តាំងពីឆ្នាំ១៩៩៧។ ទិវានេះ មានគោលបំណងបំផុសឡើងវិញនូវវប្បធម៌ និងប្រពៃណី នៃការរម្លឹកគុណូបការៈរបស់សិស្ស ចំពោះគ្រូបង្រៀននៅទូទាំងប្រទេស៕
© រក្សាសិទ្ធិដោយ thmeythmey.com