លោក តុប សុភ័ក រដ្ឋលេខាធិការក្រសួងទេសចរណ៍ បានលើកឡើងក្នុងសន្និសីទសារព័ត៌មានស្ដីពីវឌ្ឍនភាពនៃវិស័យទេសចរណ៍រយៈពេល៥ ឆ្នាំចុងក្រោយថា ទេសចរណ៍កម្ពុជា បានងើបឡើងវិញបណ្ដើរៗក្រោយស្ថានភាពជំងឺកូវីដ-១៩ក្នុងប្រទេសកម្ពុជាបានធូរស្រាល។ ជាមួយគ្នានេះ កម្ពុជា បានក្លាយជាគោលដៅទេសចរណ៍សុវត្ថិភាព និងទំនុកចិត្តរបស់ភ្ញៀវទេសចរអន្តរជាតិដែរ។ 

 

យ៉ាងណាមិញ រដ្ឋាភិបាល គ្រោងទាញយកទេសចរអន្តរជាតិរហូតដល់ ៧លាន៥០ម៉ឺននាក់ និងទេសចរផ្ទៃក្នុង១៦លាននាក់នៅឆ្នាំ២០២៨។ រដ្ឋបានដាក់ចេញគម្រោងអភិវឌ្ឍចំនួន៨ ដើម្បីធ្វើយ៉ាងណា នៅឆ្នាំ២០២៨ កម្ពុជាអាចទទួលបានភ្ញៀវទេសចរតាមការរំពឹងទុក។ 

 

គម្រោងទាំង ៨នោះមានដូចជា ការអភិវឌ្ឍផលិតផល និងសេវាកម្មទេសចរណ៍ប្រកបដោយនវានុវត្តន៍ និងភាពច្នៃប្រឌិត, ពង្រឹងគុណភាពសេវាកម្មឱ្យស្របតាមស្តង់ដា, ជំរុញបណ្ដុះបណ្ដាលជំនាញវិជ្ជាជីវទេសចរណ៍ឱ្យស្របតាមស្រង់ដា, សម្រួល និងពង្រឹកសេវាកម្មដឹកជញ្ជូនភ្ញៀវទេសចរ និងជំរុញសមត្ថភាពធនធានមនុស្ស ផ្សព្វផ្សាយពីទីផ្សារទេសចរណ៍។ ចំណែកគម្រោង៣ទៀត គឺជំរុញការប្រើប្រាស់បច្ចេកវិទ្យាក្នុងវិស័យទេសចរណ៍, អភិវឌ្ឍផលិតផលទេសចរណ៍ និង ការពង្រឹងអភិបាលកិច្ចទេសចរណ៍។ 

 

ជាមួយគ្នានេះ រដ្ឋលេខាធិការក្រសួងទេសចរណ៍រូបនេះអះអាងថា រដ្ឋាភិបាលកម្ពុជា នឹងធ្វើឱ្យកម្ពុជាក្លាយជាគោលដៅសុវត្ថិភាព ផាសុខភាព និងផលប្រយោជន៍។ ជាងនេះទៅទៀតរដ្ឋាភិបាលធានាការអភិវឌ្ឍទេសចរណ៍ប្រកបដោយចីរភាព៕