លោក រ័ត្ន វិរៈ រដ្ឋលេខាធិការក្រសួងបរិស្ថា​​ន លើកឡើងថា តាមរយៈការសិក្សាកន្លងមក នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះចំនួន៧៦នៅកម្ពុជា ដែលមានផ្ទៃដីប្រមាណ ៧.២លានហិកតា មានសក្តានុពលក្នុងការបង្កើតជាតំបន់ទេសចរណ៍ធម្មជាតិ ដើម្បីទាក់ទាញភ្ញៀវទេសចរជាតិ-អន្តរជាតិ។ ក្នុងតំបន់ការពារ និងអភិរក្សទាំងនោះមានសក្តានុពលដូចជា ជីវៈចម្រុះ ព្រៃឈើ សត្វព្រៃ សត្វស្លាប ទឹកធ្លាក់ ឆ្នេរ និងកោះជាដើម។ 
  

ជាមួយគ្នានេះ ការដាក់ឱ្យអនុវត្តគម្រោងអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិខ្នាតតូច ដែលមានទំហំដីក្រោម ១០ហិកតានៅតំបន់ការពារធម្មជាតិ និងដែនអភិរក្ស  គឺដើម្បីសម្រួលដល់វិស័យឯកជនដែលទទួលបានសិទ្ធអភិវឌ្ឍន៍ទេសចរណ៍ធម្មជាតិទាំងនោះ។ លើសពីនេះម្ចាស់គម្រោង អាចកំណត់ដែនវិសាលភាពនៃការអភិវឌ្ឍ ដោយប្រើប្រាស់លក្ខណៈវិនិច្ឆ័យជាឧបករណ៍ក្នុងការវាយតម្លៃលើគ្រប់ទិដ្ឋភាពពាក់ព័ន្ធ។
 

តាមរយៈការអនុវត្តគម្រោងអភិវឌ្ឍន៍ទេសចរណ៍ផ្សារភ្ជាប់ទឹកដីនេះ លោក រ័ត្ន វិរៈ រំពឹងថាគម្រោងនេះនឹងចូលរួមការស្ដារវិស័យទេសចរណ៍កម្ពុជាដែលត្រូវទទួលរងផលប៉ះពាល់ដោយសារជំងឺកូវីដ-១៩។ គម្រោងនេះ ក៏នឹងជួយលើកស្ទួយជីវភាពប្រជាជនតាមតំបន់ការពារធម្មជាតិ​ និងរបៀងអភិរក្សនានាដែរ។ 
 

សូមជម្រាបថា ក្រសួងបរិស្ថានបានកំណត់តំបន់អេកូទេសចរណ៍អាទិភាពថ្នាក់ជាតិចំនួន ៦ ដើម្បីការអភិវឌ្ឍទេសចរណ៍ មានដូចជា ឧទ្យានជាតិព្រះជ័យវរ្ម័ន-នរោត្តម«ភ្នំគូលែន», តំបន់អេកូទេសចរណ៍ទេសភាពជួរភ្នំក្រវាញ, តំបន់អេកូទេសចរណ៍ឆ្នេរ, តំបន់អេកូទេសចរណ៍បឹងទន្លេសាប, តំបន់អេកូទេសចរណ៍ព្រៃឡង់ និងតំបន់អេកូទេសចរណ៍ភូមិភាគឦសាន៕