កីឡាករ ស៊ូ យ៉ាទី អ្នកចាំទីក្លិបបាល់ទាត់ណាហ្គាវើលដ៍ ធ្លាប់ជាប់ជាអ្នកចាំទីឲ្យកម្ពុជា តាំងពីឆ្នាំ២០១២។ អំឡុងពេល លោក Keisuke Honda មកដឹកនាំនៅពាក់កណ្ដាលឆ្នាំ២០១៨ អ្នកចាំទីរូបនេះ ត្រូវបានកោះហៅឲ្យចូលជាមួយក្រុមជម្រើសជាតិ ដោយត្រូវជួបជាមួយ ម៉ាឡេស៊ី ក្នុងការប្រកួតមិត្តភាព។ ការបង្ហាញរបស់លោក Honda ដំបូងបានបរាជ័យ ដោយកម្ពុជា ចាញ់ ម៉ាឡេស៊ី ក្នុងលទ្ធផល ៣-១។ កីឡាកររូបនេះ បានបង្ហាញខ្លួនតែមួយលើក ក្នុងពេលដែលលោក Keisuke Honda បានមកដឹកនាំកម្ពុជា ចាប់ពីឆ្នាំ២០១៨ រហូតមកទល់ពេលនេះ។


 ហ៊ុល គឹមហ៊ុយ អ្នកចាំទីក្លិបបឹងកេត រូបពី Cambodian Premier League

រីឯ កីឡាករ កែវ សុខសិលា អ្នកចាំទីក្លិបបាល់ទាត់វិសាខា បានបង្ហាញខ្លួនឲ្យឈុតធំកម្ពុជា ដំបូងនៅខែតុលា ឆ្នាំ២០១៨ ក្នុងជំនួបមិត្តភាព កម្ពុជា និងទីម័រខាងកើត ដោយលទ្ធផលនៃការប្រកួត ២-២។ អ្នកចាំទីរូបនេះ បានបង្ហាញខ្លួនឲ្យក្រុមជម្រើសជាតិកម្ពុជា ចាប់ពីឆ្នាំ២០១៨ រហូតមកដល់ឆ្នាំ២០២២ បានចំនួន១៧ ប្រកួតដោយក្នុងនោះ ឈ្នះ៤, ស្មើ៤ និងចាញ់៩។ 

កីឡាករ អ៊ំ វិចិត្រ អ្នកចាំទីក្លិបកងយោធពលខេមរភូមិន្ទ បានជាប់ជាអ្នកចាំទីជម្រើសជាតិ ៣ប្រកួត ក្នុងពេលដែលកម្ពុជា ប្រកួតព្រឹត្តិការណ៍ AFF Cup 2018។ កម្ពុជា បានឈ្នះ ឡាវ ៣-១, ចាញ់ ម៉ាឡេស៊ី ១-០ និងចាញ់ វៀតណាម ៣-០។


 កែវ សុខសិលា អ្នកចាំទីក្លិបវិសាខា រូបពី Cambodian Premier League

កីឡាករ ហ៊ុល គឹមហ៊ុយ អ្នកចាំទីក្លឹបបឹងកេត បានបង្ហាញខ្លួនក្នុងជម្រើសជាតិកម្ពុជាដំបូង ក្នុងដើមឆ្នាំ២០១៩ ក្នុងការប្រកួតមិត្តភាព ជាមួយបង់ក្លាដេស ដោយចាញ់ក្នុងលទ្ធផល ១-០។ អ្នកចាំទីរូបនេះ បានបង្ហាញខ្លួនក្នុងជម្រើសជាតិ ៩លើក ដោយរាប់ទាំងការប្រកួតមិត្តភាពជាមួយយុវជនជប៉ុនក្រោម ២៣ឆ្នាំ។ ចំពោះ៩ប្រកួតនោះ កម្ពុជា ឈ្នះ២ ចាញ់៧។ 
 

គួរបញ្ជាក់ផងដែរថា ចាប់តាំងពីលោក Keisuke Honda បានមកដឹកនាំជម្រើសជាតិបាល់ទាត់កម្ពុជា ដោយគិតពីឆ្នាំ២០១៨ មកដល់២០២២ កីឡាករ ៦៣រូបបានចូលលេងឲ្យជម្រើសជាតិកម្ពុជា ដោយក្នុងនោះ មានអ្នកចាំទីទាំង៤ ខាងលើនេះផងដែរ៕