ចាប់ផ្តើមពីឈុតយុវជននៅឆ្នាំ២០០៣ ហើយបន្តដល់ឈុតជម្រើសជាតិ និងឆ្លងកាត់ក្លិបអាជីពចំនួន៤ អ្នកចាំទី សំរិត សីហា ប្រកាសសម្រេចព្យួរស្រោមដៃនៅក្នុងវ័យ៣៥ឆ្នាំ។ កាលពីថ្ងៃទី១៥ ខែតុលា ក្លិបណាហ្គាវើលដ៍ បានរៀបចំពិធីលាគ្នាជាមួយអ្នកចាំទីរបស់ខ្លួន នាថ្ងៃប្រកួតសប្តាហ៍ទី២០នៃពានរង្វាន់ខេមបូឌានព្រីមៀរលីគនៅកីឡដ្ឋានខេត្តកំពង់ស្ពឺ ជាមួយភ្នំពេញក្រោន ក្រោមក្រសែភ្នែកអ្នកទស្សនាផ្ទាល់ជិត២៤០០នាក់។
១៩ឆ្នាំក្នុងអាជីពជាកីឡាករបាល់ទាត់ សីហា មានអនុស្សាវរីយ៍ជាច្រើន ជាពិសេសឱកាសដែលបានលេងឲ្យក្រុមជម្រើសជាតិពីឆ្នាំ២០០៧ ដល់ឆ្នាំ២០១៣ លេងឈុតស៊ីហ្គេម និងឈុតយុវជនផ្សេងៗ ក៏ដូចជាក្លិបក្រសួងការពារជាតិ (កងយោធពលខេមរភូមិន្ទ), ភ្នំពេញក្រោន, ខេមបូឌាថៃហ្គឺរ (អង្គរថាយហ្គឺរ) និងរួមរស់ជាមួយណាហ្គាវើលដ៍នារយៈពេល៨ឆ្នាំចុងក្រោយ។
«មួយគឺចង់ទុកឱកាសឲ្យកីឡាករជំនាន់ក្រោយ និងមួយទៀតគឺចង់ប្តូរអាជីពទៅប្រកបរបររកស៊ីវិញ»។ នេះជាមូលហេតុចម្បងរបស់សីហា បានអះអាង ទាក់ទងនឹងការចូលនិវត្តន៍របស់ខ្លួនពីកីឡាករបាល់ទាត់ ប៉ុន្តែមិនមានការបញ្ជាក់លម្អិតនោះឡើយ។ ចុងក្រោយនេះ សីហា ក៏ស្ថិតក្នុងចំណោមជាសមាជិកក្រុមគ្រូបង្វឹកនៃឈុត U-20 សម្រាប់ការប្រកួតវគ្គជម្រុះ AFC U20 Championship 2023 ផងដែរ។
ខាងក្រោមនេះ ជាកិច្ចសម្ភាសរវាងលោកទេព ពិទូរ្យ ការីនិពន្ធព័ត៌មានកីឡានៃសារព័ត៌មានថ្មីៗ ជាមួយកីឡាករ សំរិត សីហា៖
ទេព ពិទូរ្យ៖ ហេតុអ្វី សីហា សម្រេចចិត្តចូលនិវត្តន៍ពីអាជីពកីឡាករបាល់ទាត់ត្រឹមវ័យ៣៥ឆ្នាំ?
សំរិត សីហា៖ វ័យយើងចាស់ដែរហើយ រយៈពេល១៩ឆ្នាំក្នុងវិស័យបាល់ទាត់គឺល្មមគ្រប់ហើយ ។ មួយវិញទៀត ខ្ញុំក៏ចង់ទុកឱកាសដើម្បីឱ្យកីឡាករក្មេងៗជំនាន់ក្រោយជំនួសកន្លែងខ្ញុំផង។ ម្យ៉ាង ខ្ញុំក៏មិនសូវបានលេងដែរនារយៈពេលចុងក្រោយនេះ។ ជាងនេះទៀត ខ្ញុំក៏រវល់ក្នុងមុខរបររកស៊ីថ្មីផង ទើបសម្រេចចូលនិវត្តន៍តែម្តងទៅ។
ទេព ពិទូរ្យ៖ ១៩ឆ្នាំក្នុងអាជីព តើសីហា សម្រេចបានអ្វីខ្លះ?
សំរិត សីហា៖ រយៈ១៩ឆ្នាំមកនេះ សម្រាប់ក្លិប បានជួយក្លិបក្រសួងការពារជាតិ លើកពានសម្តេចហ៊ុន សែន ឆ្នាំ២០១០ និងជួយណាហ្គាវើលដ៍លើកពានលីគកំពូលកម្ពុជាឆ្នាំ២០១៨ [កាលណោះ សីហា ជាប់ជាអ្នកចាំទីឆ្នើមប្រចាំរដូវកាល] ។ សម្រាប់ជម្រើសជាតិកម្ពុជា ខ្ញុំបានជួយក្រុមឱ្យឡើងវគ្គជម្រុះ AFC SUZUKI Cup ឆ្នាំ២០០៨ និងលេងឱ្យក្រុមអាយុក្រោម២១ឆ្នាំ ឈ្នះមេដាយសំរឹទ្ធពានស្តេចព្រុយណេ Hassanal Bolkiah Trophy នៅឆ្នាំ២០០៧។
ទេព ពិទូរ្យ៖ តើអនុស្សាវរីយ៍អ្វីខ្លះដែលសីហា ចងចាំបំផុតក្នុងតួនាទីជាអ្នកចាំទី?
សំរិត សីហា៖ អនុស្សាវរីយ៍ ពិតជាមានច្រើនណាស់បង! ដោយសារយើងនៅជាមួយកីឡាបាល់ទាត់នេះយូរឆ្នាំហើយ ពៅចាប់តាំងពីជម្រើសអាយុក្រោម១៥ឆ្នាំមកម្ល៉េះ។
ទេព ពិទូរ្យ៖ ក្នុងក្លិបអាជីពចំនួន៤ តើនៅក្លិបមួយណាដែល សីហា បានជោគជ័យជាងគេ?
សំរិត សីហា៖ ខ្ញុំធ្លាប់លេងឱ្យ៤ក្លិប រួមមាន ក្រសួងការពារជាតិ (បច្ចុប្បន្ន កងយោធពលខេមរភូមិន្ទ) រយៈពេល៨រដូវកាល ភ្នំពេញក្រោន រយៈពេល២ឆ្នាំ អង្គរថាយហ្គឺរ១ឆ្នាំ និងចុងក្រោយណាហ្គារយៈពេល៨ឆ្នាំផងដែរ។ ខ្ញុំសុទ្ធតែរីករាយជាមួយក្លិបទាំងនោះ ប៉ុន្តែបើនិយាយពីជោគជ័យខ្លាំង គឺកាលនៅក្លិបការពារជាតិ ដោយសារពេលនោះខ្ញុំបានលេងគ្រប់ឈុត ហើយនៅណាហ្គាវើលដ៍ ក៏ខ្ញុំបានបង្កើតស្នាដៃច្រើនដែរ។
ទេព ពិទូរ្យ៖ តើ សីហា មានទស្សនះបែបណាចំពោះអនាគតបាល់ទាត់ខ្មែរ?
សំរិត សីហា៖ បាទ! ចាប់ពីពេលនេះគឺមានការរីកចម្រើនច្រើន។ ពីមុនមានតែកីឡដ្ឋានពីរប៉ុណ្ណោះ គឺអូឡាំពិក និងស្តាតចាស់ប៉ុណ្ណោះ ប៉ុន្តែឥឡូវមានច្រើន ហើយសម្រាប់ក្លិបនិមួយៗសុទ្ធតែមានកីឡដ្ឋានផ្ទាល់ខ្លួន និងថែមទាំងមានពេទ្យប្រចាំក្លិបផង។ ស្ទើរតែគ្រប់ក្លិបសព្វថ្ងៃសុទ្ធតែមានយុវជនថ្នាលរបស់ពួកគេរៀងៗខ្លួន ហើយអ្វីដែលពិសេស អ្នកគាំទ្រក៏មានច្រើន ជាមួយអ្នកឧបត្ថម្ភក៏មានភាពល្អប្រសើរជាងមុនឆ្ងាយដែរ។ ទាំងនេះជាផលវិជ្ជមានមួយដែលធ្វើឱ្យវិស័យបាល់ទាត់នៅស្រុកខ្មែរយើង កាន់តែរីកចម្រើន៕