អន្តរជាតិ
នយោបាយអន្តរជាតិ
របាយការណ៍៖ ចិននិងរុស្ស៊ី ជួយឱ្យយោធាមីយ៉ាន់ម៉ាបន្តកាន់អំណាច
× សមាជិកសភាអន្តរជាតិមួយក្រុមនៅថ្ងៃទី២ ខែវិច្ឆិកា បានចេញរបាយការណ៍មួយស្ដីអំពីការគាំទ្ររបស់ ចិន រុស្ស៊ី និងឥណ្ឌាដែលបានជំរុញឱ្យរបបយោធាមីយ៉ាន់ម៉ាអាចបន្តការកាន់អំណាច ហើយបន្តប្រើអំពើហិង្សា និងបំពានលើសិទ្ធិមនុស្ស ទោះបីជារបបមួយនេះបរាជ័យក្នុងការបង្រួបបង្រួមប្រទេសក្រោយការដណ្ដើមកាន់កាប់អំណាចកាលពីឆ្នាំមុន។
របាយការណ៍របស់សមាជិកសភាអន្តរជាតិដែលទទួលបានការគាំទ្រពីសមាជិកសភាអាស៊ានដើម្បីសិទ្ធិមនុស្ស (APHR) ចេញផ្សាយនៅថ្ងៃទី២ ខែវិច្ឆិកា អះអាងថា ការគាំទ្រដែលមិនគួរមានរបស់ក្រុងប៉េកាំង និងក្រុងមូស្គូសម្រាប់យោធាមីយ៉ាន់មាចំពេលដែលរបបមួយនេះមិនបានធ្វើតាមផែនការសន្តិភាពដែលអាស៊ានបានដាក់ស្នើនោះឡើយ។
«ការជួយជ្រោមជ្រែង និងការផ្ដល់ជំនួយដោយរដ្ឋាភិបាលទាំងនោះអនុញ្ញតរបបមីយ៉ាន់ម៉ាដើម្បីបន្តការកាន់អំណាច ប្រើអំពើហិង្សា ព្រមទាំងបំពានលើសិទ្ធិមនុស្ស»។ របាយការណ៍ខាងលើ បានលើកឡើងបែបនេះរួចបន្តថា សម្ព័ន្ធមិត្តយោធាមីយ៉ាន់ម៉ាទាំងនោះ មើលឃើញពីផលប្រយោជន៍ដែលពួកគេអាចទទួលបានក្រុមប្រឹក្សារដ្ឋ (SCA) ដែលកាន់កាប់ដោយយោធា។
កន្លងមក រដ្ឋាភិបាលចិន ត្រូវមើលឃើញថា បន្តទំនាក់ទំនងជាមួយក្បាលម៉ាស៊ីនយោធាតាមធម្មតាហើយបានស្វែងរកការការពាររបបយោធាពីការទទួលខុសត្រូវថែមទៀតក្នុងគោលបំណងរក្សាផលប្រយោជន៍សេដ្ឋកិច្ច និងយុទ្ធសាស្ត្ររបស់ខ្លួននៅក្នុងមីយ៉ាន់ម៉ា។
ឯរុស្ស៊ីវិញបានបង្ហាញការគាំទ្រយ៉ាងខ្លាំងចំពោះរបបសឹកដែរ។ ទីក្រុងមូស្គូបានបញ្ជូនតំណាងផ្លូវការទៅចូលរួមពិធីអបអរសាទរទិវាកងកម្លាំងប្រដាប់អាវុធរបស់យោធាដែលបានធ្វើឡើងនៅទីក្រុងណៃពីដោកាលពីថ្ងៃទី៧ ខែមីនា ខណៈដែលកងកម្លាំងសន្តិសុខបានសម្លាប់បាតុករជាច្រើន។ ឧត្តមសេនីយ៍ មីន អ៊ុង ឡាំង ក៏ត្រូវបានស្វាគមន៍នៅរុស្ស៊ីយ៉ាងហោចណាស់បីដងចាប់តាំងពីរដ្ឋប្រហារ។ ក្នុងដំណើរទស្សនកិច្ចថ្មីៗបំផុតរបស់លោកនៅទីនោះក្នុងខែកញ្ញា ឧត្តមសេនីយ៍រូបនេះថែមទាំងបានជួបប្រធានាធិបតីលោក វ្ល៉ាឌីមៀ ពូទីនផងដែរ៕
© រក្សាសិទ្ធិដោយ thmeythmey.com