ដោយសារតែការឈ្លានពានរបស់រុស្ស៊ីនៅអ៊ុយក្រែនធ្វើឱ្យតម្លៃថាមពលកើនឡើងយ៉ាងខ្លាំងនៅទីផ្សារសាកល បណ្តាប្រទេសជាច្រើនដែលប្តេជ្ញាងាកទៅរកការប្រើប្រាស់ថាមពលកកើតឡើងវិញហាក់ដូចជាកំពុងផ្លាស់អាទិភាពទាំងនេះវិញយ៉ាងហោចណាស់ក៏ក្នុងរយៈពេលខ្លីដែរ។ 

 

ទន្ទឹមនេះ អាហ្វ្រិកដែលជាទ្វីបសក្តានុពលសម្បូរទៅដោយឥន្ធនៈផូស៊ីលដែលមានរ៉ែបម្រុងពិភពលោកប្រហែល៣០ភាគរយ ប្រេងពិភពលោក១២ភាគរយ និងឧស្ម័នធម្មជាតិបម្រុង៨ភាគរយ កំពុងរកទីផ្សារនាំចេញ ក៏ដូចជាឱកាសបញ្ចប់ភាពក្រខ្សត់នៃប្រេងឥន្ធនៈក្នុងស្រុក។

 

នាសន្និសីទស្តីពីបម្រែបម្រួលអាកាសធាតុលើកទី២៧របស់អង្គការសហប្រជាជាតិ(COP27) នៅអេហ្ស៊ីប រដ្ឋាភិបាលនៅតំបន់នេះលើកឡើងថា ប្រទេសអ្នកមានត្រូវតែអនុញ្ញាតឱ្យរដ្ឋនៅអាហ្វ្រិកអភិវឌ្ឍធនធានឥន្ធនៈផូស៊ីលដើម្បីជួយប្រជាជនរួចផុតពីភាពក្រីក្រ។

 

« មានវត្តមានក្រុមហ៊ុនប្រេង និងហ្គាសជាច្រើននៅ COP ពីព្រោះទ្វីបអាហ្វ្រិកចង់ផ្ញើសារមួយថា ពួកយើងនឹងអភិវឌ្ឍប្រភពថាមពលរបស់យើងទាំងអស់សម្រាប់ប្រយោជន៍ប្រជាជនយើង ពីព្រោះបញ្ហារបស់យើងគឺភាពក្រខ្សត់នៃថាមពល»។ លោកស្រី Maggy Shino នៃក្រសួងរ៉ែ និងថាមពលនៅណាមីប៊ីថ្លែងបែបនេះនៅ COP27។ 

 

បើតាមលោកស្រី Shino បណ្តាប្រទេសអ្នកមានបរាជ័យផ្តល់លុយដែលសន្យាជួយបណ្តាប្រទេសនៅតំបន់អាហ្វ្រិកអភិវឌ្ឍថាមពលស្អាតជំនួសឱ្យការទាញយកធនធានឥន្ធនៈផូស៊ីលរបស់ពួកគេ។ លោកស្រីបន្ថែមទៀតថា ប្រសិនបើប្រទេសអ្នកមានទាំងឡាយប្រាប់ឱ្យរដ្ឋនៅអាហ្វ្រិកទុកធនធានឥន្ធនៈផូស៊ីលចោល ប្រទេសទាំងនោះត្រូវត្រៀមផ្តល់សំណងសមរម្យត្រឡប់ទៅវិញ៕