ភ្នំពេញ៖ រដ្ឋបាលខេត្តកំពង់ស្ពឺ និងរដ្ឋបាលខេត្តត្បូងឃ្មុំ នឹងផ្ដល់កន្លែងស្នាក់នៅ រួមទាំងការផ្ញើកង់ ម៉ូតូ ដោយឥតគិតថ្លៃ ក្នុងពេលដំណើរការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី៥-៦ ធ្នូខាងមុខ។ បើតាមរដ្ឋបាលខេត្តទាំងពីរ ការផ្ដល់ជូននេះ ដើម្បីសម្រួលដល់ការស្នាក់នៅ និងការរក្សាកង់-ម៉ូតូរបស់បេក្ខជនមកពីបណ្ដាស្រុក ក្រុង ដែលមិនមានលទ្ធភាពគ្រប់គ្រាន់ក្នុងការចំណាយ។
ខេត្តកំពង់ស្ពឺ បានរៀបចំកន្លែងស្នាក់នៅតាមមន្ទីរ និងវត្តអារាមនានាសរុបចំនួន ១៨ទីតាំង សម្រាប់បេក្ខជនប្រឡងសញ្ញាបត្រមធ្យមសិក្សាទុតិយភូមិស្នាក់នៅ និងផ្ញើកង់-ម៉ូតូ។ ទីតាំងទាំង១៨កន្លែងនោះ រួមមាន អគារធនធាន មន្ទីរអប់រំ យុវជន និងកីឡា, សាលាគរុកោសល្យ និវិក្រិតការ, មន្ទីរធម្មការ និងសាសនា, មន្ទីរសេដ្ឋកិច្ច និងហិរញ្ញវត្ថុ, មន្ទីរសាធារណការ និងដឹកជញ្ជូន, មន្ទីរធនធានទឹក និងឧតុនិយម, មន្ទីរវប្បធម៌ និងវិចិត្រសិល្បៈ, វត្តសាឡូងពោធិមង្គល, វត្តចំបក់, វត្តចំបក់ពោធិ៍ពាន់, វត្តភ្នំសុពណ៌ទេព, វត្តសាមគ្គីរាជរារាម, វត្តនទីសោភ័ណ, វត្តមុនីរង្សីរតនារាម, វត្តអម្ពសុវណ្ណារាម, វត្តចំណារាម, វត្តកណ្ដោលជុំ និងវត្តព្រះពុទ្ធអណ្ដែត។
បេក្ខជនដើរចេញពីមណ្ឌលប្រឡង។ រូបភាព Credit
ដោយឡែក ខេត្តត្បូងឃ្មុំវិញ ក៏បានរៀបចំកន្លែងស្នាក់នៅដល់បេក្ខជនប្រឡង នៅក្នុងស្រុកត្បូងឃ្មុំ និងក្រុងសួង រយៈពេល២ថ្ងៃ ពីថ្ងៃទី៤-៥ ធ្នូ។ សម្រាប់នៅក្រុងសួង បេក្ខជន អាចស្នាក់នៅ ផ្ទះសំណាក់ផ្សារសួង២, ផ្ទះសំណាក់សុខ លាភ, ផ្ទះសំណាក់ ៣៣៣, ផ្ទះសំណាក់អ៊ាត អ៊ន់, ផ្ទះសំណាក់បាយ័ន, ផ្ទះសំណាក់យូ ឡុង, ផ្ទះសំណាក់ភ្នំមាស, ផ្ទះសំណាក់៦៦៦, ផ្ទះសំណាក់អប្សរា, ផ្ទះសំណាក់សំណាង រាត្រី និងផ្ទះសំណាក់ចែលី។
រីឯស្រុកត្បូងឃ្មុំ បេក្ខជនអាចទៅស្នាក់នៅ ផ្ទះសំណាក់ពន្លឺ ចន្ទ, ផ្ទះសំណាក់កូលាប ត្បូងឃ្មុំ, ផ្ទះសំណាក់សុចរិតមហាឧត្តម, ផ្ទះសំណាក់មហា លាភ, ផ្ទះសំណាក់WiFi, ផ្ទះសំណាក់រាត្រីចាំការថ្ម, ផ្ទះសំណាក់រស្មីនារី, ផ្ទះសំណាក់នាគពីរ, ផ្ទះសំណាក់គីម ប៉, ផ្ទះសំណាក់ខុម សីលា, ផ្ទះសំណាក់សុវណ្ណភូមិត្បូងឃ្មុំ និងផ្ទះសំណាក់មាន ហេង។ បើតាមសេចក្ដីជូនដំណឹងរបស់រដ្ឋបាលខេត្តត្បូងឃ្មុំ ក្រៅពីផ្ទះសំណាក់ខាងលើ រដ្ឋបាលខេត្តត្បូងឃ្មុំមិនទទួលខុសត្រូវឡើយ។
សូមបញ្ជាក់ថា ក្នុងសន្និសីទសារព័ត៌មានស្ដីពីការប្រឡងសញ្ញាបត្រមធ្យមសិក្សាទុតិយភូមិ កាលពីថ្ងៃទី២១ វិច្ឆិកា លោក ហង់ជួន ណារ៉ុន បានអំពាវនាវដល់សណ្ឋាគារ កន្លែងស្នាក់នៅ និងភោជនីយដ្ឋាន កន្លែងលក់អាហារផ្សេងៗ ជួយសម្រួលដល់បេក្ខជនដែលមកពីតាមឃុំ ស្រុក ដើម្បីឱ្យពួកគេអាចស្នាក់នៅ និងទទួលទានបានស្រួល៕