បើតាមនាយករងនៃសាលាបឋមសិក្សាក្ដីដូង ការផ្ដល់អាហារូបករណ៍នេះ គឺសម្រាប់តែសិស្សក្រីក្រប៉ុណ្ណោះ ហើយសិស្សក្រីក្រទៀតសោត ត្រូវឆ្លងកាត់ការវាយតម្លៃពីអ្នកដឹកនាំសាលា អាជ្ញាធរភូមិ-ឃុំ។ លោក ហេង ភារ៉ុម ពន្យល់បន្ថែមដូច្នេះ៖ «មុនផ្ដល់អាហារូបករណ៍​ គឺត្រូវជ្រើសសិស្ស ទីមួយគឺយើងជ្រើសតាមសហគមន៍ តាមភូមិ តាមគ្រូ តាមសិស្ស។ ហើយយើងចុះទៅដល់ផ្ទះគាត់ ថាតើគាត់ខ្វះមែនអត់។ ការសម្រេចគឺ មិនត្រឹមតែគ្រូៗទេ គឺពីមេភូមិ មេឃុំ ផងដែរ ក្នុងការសម្រេច»។ 

លោក ហេង ភារ៉ុម នាយករងនៅសាលាបឋមសិក្សាក្ដីដូង លើកឡើងថា ការផ្ដល់អាហារូបករណ៍ មានសារៈសំខាន់ណាស់សម្រាប់សិស្សក្រីក្រ គឺពួកគេអាចយកថវិកាទាំងនោះ ទៅទិញនូវសម្ភារៈសិក្សា សម្លៀកបំពាក់ និងសន្សំលុយនោះ ទុកសម្រាប់ទិញមធ្យោបាយធ្វើដំណើរ(កង់) ដើម្បីធ្វើដំណើរទៅសិក្សា នៅថ្នាក់អនុវិទ្យាល័យផងដែរ។

 

 

ក្រៅពីអាហារូបករណ៍រដ្ឋាភិបាល សាលាក៏មានរៀបចំកម្មវិធីផ្ដល់សម្ភារៈសិក្សា សម្រាប់សិស្សពូកែបំណាច់ឆ្នាំរៀងរាល់ឆ្នាំផងដែរ ដើម្បីជំរុញលើកទឹកចិត្តសិស្ស។ ជាមួយគ្នានេះ កន្លងមកក៏មានអង្គការ និងសប្បុរសជន ផ្ដល់ជាសម្ភារសិក្ស និងមធ្យោបាយធ្វើដំណើរ(កង់) ដល់សិស្សក្រីក្រផងដែរ៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ