ជាតិ
សម្ដេច ហ៊ុន សែន ចង់ឱ្យមានការរៀបចំវេទិកាជាតិតំបន់ឆ្នេរប្រចាំឆ្នាំ នៅថ្ងៃទី២៦ ឧសភា ជារៀងរាល់ឆ្នាំ សម្ដេច ហ៊ុន សែន នាយករដ្ឋមន្រ្តីកម្ពុជា អញ្ជើញចូលរួមនៅក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។ រូបភាពពី SPM
× ភ្នំពេញ៖ សម្ដេច ហ៊ុន សែន នាយករដ្ឋមន្រ្តីកម្ពុជា បានស្នើឱ្យមានការរៀបចំវេទិកាជាតិតំបន់ឆ្នេរប្រចាំឆ្នាំ ដោយកំណត់យកថ្ងៃទី២៦ ឧសភា ជារៀងរាល់ឆ្នា។ បើតាមសម្ដេច វេទិកាជាតិតំបន់ឆ្នេរប្រចាំឆ្នាំនេះ អាចឆ្លាស់វេនគ្នានៅតាមបណ្ដាខេត្តតំបន់ឆ្នេរទាំង៤។
នាពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ សម្ដេច ហ៊ុន សែន បានផ្ដល់អនុសាសន៍គន្លឹះមួយចំនួន ដោយស្នើឱ្យមានការរៀបចំវេទិកាជាតិតំបន់ឆ្នេរប្រចាំឆ្នាំ។ សម្ដេច បន្តថា ការរៀបចំវេទិកាជាតិតំបន់ឆ្នេរប្រចាំឆ្នាំនេះ ដើម្បីជួបជុំ ពិភាក្សា និងផ្លាស់ប្ដូរយោបល់ជុំវិញការអភិវឌ្ឍតំបន់ឆ្នេរសមុទ្រកម្ពុជា។
ជាមួយគ្នានេះ សម្ដេច ក៏បានផ្ដល់យោបល់ឱ្យកំណត់យកថ្ងៃទី ២៦ ខែឧសភា ជារៀងរាល់ឆ្នាំ ដែលជាថ្ងៃកម្ពុជាក្លាយជាសមាជិកក្លឹប ដើម្បីរៀបចំ។ មួយវិញទៀត វេទិកាជាតិតំបន់ឆ្នេរប្រចាំឆ្នាំនេះ អាចឆ្លាស់វេនគ្នានៅតាមបណ្ដាខេត្តតំបន់ឆ្នេរទាំង៤ផងដែរ។
សូមបញ្ជាក់ថា នាពេលកន្លងមក រដ្ឋាភិបាលកម្ពុជា បានកំណត់ជាយុទ្ធសាស្រ្ត ក្នុងការអភិវឌ្ឍវិស័យទេសចរណ៍ខេត្តតំបន់ឆ្នេរ ដោយខេត្តព្រះសីហនុ ជាគោលដៅទេសចរណ៍សម្រាកលម្ហែ និងជាតំបន់សេដ្ឋកិច្ចពហុបំណង។ ចំណែកខេត្តកែប ជាគោលដៅទីក្រុងទេសចរណ៍លំដាប់ខ្ពស់ និងប្រណិត។ រីឯខេត្តកំពតវិញ ជាគោលដៅទីក្រុងទេសចរណ៍បេតិកភណ្ឌវប្បធម៌ និងកសិ-ទេសចរណ៍តំបន់ឆ្នេរ។ ដោយឡែក ខេត្តកោះកុង ជាគោលដៅអេកូទេសចរណ៍តំបន់ទេសចរណ៍លំដាប់ពិភពលោកផងដែរ៕
© រក្សាសិទ្ធិដោយ thmeythmey.com