សង្គ្រាមរវាងរុស្ស៊ីនិងអ៊ុយក្រែនដែលផ្ទុះឡើងតាំងពីខែកុម្ភៈ គិតមកទល់ពេលនេះបានអូសបន្លាយជិត ១០ ខែហើយ ខណៈកងកម្លាំងរបស់ទីក្រុងកៀវ បានដណ្តើមយកទឹកដីខ្លួនដែលគ្រប់គ្រងដោយរុស្ស៊ីមួយចំនួនមកវិញ។ យ៉ាងណាមិញ អគ្គលេខាធិការអង្គការណាតូលោក Jens Stoltenberg បានព្រមានថា រុស្ស៊ីនឹងមិនព្រមបោះបង់គោលដៅក្នុងការគ្រប់គ្រងអ៊ុយក្រែននោះទេ។
 

«យើងមិនគួរមើលស្រាលរុស្ស៊ីទេ។ រុស្ស៊ីកំពុងរៀបចំផែនការសម្រាប់សង្រ្គាមរយៈយូរ»។ លោក Stoltenbergបាននិយាយបែបនេះក្នុងបទសម្ភាសមួយជាមួយទីភ្នាក់ងារព័ត៌មាន AFP។ លោកក៏បានបន្ថែមថា លោកបានឃើញពីការប្រមូលផ្តុំកម្លាំងបន្ថែមទៀតរបស់រុស្ស៊ី។
 

លើសពីនេះ លោក Stoltenberg បានសង្កត់ធ្ងន់ថា ប្រធានាធិបតី ពូទីន បានត្រៀមខ្លួនរួចជាស្រេចក្នុងសង្រ្គាមសម្រាប់រយៈវែង និងត្រៀមខ្លួនបើកការវាយលុកថ្មី។ លោក Stoltenberg ក៏បានបន្តថាសង្រ្គាមនេះទំនងជាអាចបញ្ចប់នៅតុចរចា ដូចសង្រ្គាមភាគច្រើន ដោយទទូចថាដំណោះស្រាយក្នុងការបញ្ចប់សង្រ្គាមងត្រូវតែធានាថា អ៊ុយក្រែនឈ្នះក្នុងឋានៈជាប្រទេសឯករាជ្យ និងអធិបតេយ្យភាព។
 

មធ្យោបាយលឿនបំផុតដើម្បីធានាពីការចរចាបញ្ចប់សង្រ្គាមនេះ គឺត្រូវគាំទ្រយោធាអ៊ុយក្រែន បើម្បីឱ្យប្រធានាធិបតីរុស្ស៊ីលោក ពូទីន ដឹងខ្លួនថាមិនអាចឈ្នះនៅក្នុងសង្រ្គាមនេះបាន។ នេះបើតាមលោក Stoltenberg។
 

គួរបញ្ជាក់ថា កន្លងមកសម្ព័ន្ធមិត្តអង្គការណាតូ ដែលដឹកនាំដោយអាម៉េរិក បានបញ្ជូនសព្វាវុធមានតម្លៃរាប់ពាន់លានដុល្លារទៅឱ្យអ៊ុយក្រែន ដែលបានជួយប្រទេសនេះទប់ទល់នឹងរុស្ស៊ីបាន។ បើតាមរបាយការណ៍របស់អាម៉េរិក ទីក្រុងវ៉ាស៊ីនតោនកំពុងបញ្ចប់ផែនការបញ្ជូនប្រព័ន្ធបាញ់មីស៊ីល Patriot ទំនើបបំផុតរបស់ខ្លួនទៅអ៊ុយក្រែន ដើម្បីបន្ថែមការការពារដែនអាកាស៕