ថ្លែងក្រោយកិច្ចប្រជុំគណៈរដ្ឋមន្រ្តី លោក អាន់វ៉ា អ៊ីប្រាហ៊ីម បញ្ជាក់ថា​ ក្រុមប្រឹក្សាស្ដារជាតិដែលដឹកនាំដោយអតីតនាយករដ្ឋមន្រ្តី មូហ៊ីឌីន យ៉ាស៊ីន ត្រូវរំលាយហើយដោយសារការងារជាន់គ្នាជាមួយការងាររដ្ឋាភិបាល។ លោក មូហ៊ីឌីន ត្រូវតែងតាំងឱ្យដឹកនាំក្រុមប្រឹក្សានេះកាលពីខែកញ្ញា ឆ្នាំ២០២១ ដោយមានឋានៈរដ្ឋមន្រ្តីទៀតផង។

 

បើតាមលោក អាន់វ៉ា ការបន្តប្រតិបត្តិការរបស់ក្រុមប្រឹក្សានេះ មានតែធ្វើឱ្យការចំណាយរបស់រដ្ឋកើនឡើងប៉ុណ្ណោះ។ មិនមែនតែក្រុមប្រឹក្សានេះឡើយ មេដឹកនាំម៉ាឡេស៊ីរូបនេះ លើកឡើងថា ក៏មានសំណើឱ្យរំលាយស្ថាប័នចំណុះរដ្ឋាភិបាលមួយចំនួនទៀតដែលមានការត្រួតគ្នាដែរ។

 

«ឧទាហរណ៍ កាត្វកិច្ចរបស់មជ្ឈមណ្ឌលជាតិដើម្បីអភិបាលកិច្ច សុចរិតភាព និងប្រឆាំងអំពើពុករលួយ អាចត្រូវបានបំពេញដោយប៉ូលិសជាតិ និងគណៈកម្មការប្រឆាំងអំពើពុករលួយ។» លោក អាន់វ៉ា បន្ថែមបែបនេះ។

 

មិនត្រឹមស្ថាប័នរដ្ឋឡើយ លោក អាន់វ៉ា ក៏នឹងជម្រុះការងាររបស់នាយករដ្ឋមន្រ្តីមួយចំនួនទៅឱ្យឧបនាយករដ្ឋមន្រ្តីទៀតផង។

 

លោក អាន់វ៉ា ដែលរង់ចាំជាច្រើនទើបអាចក្លាយជានាយករដ្ឋមន្រ្តីនោះ ដាក់ចេញវិធានការជាច្រើន សំដៅកាត់បន្ថយបន្ទុករដ្ឋ។ លោកប្រកាសមិនយកប្រាក់ខែនាយករដ្ឋមន្ត្រីឡើយ ហើយក៏កាត់បន្ថយប្រាក់ខែរដ្ឋមន្រ្តីដែរ។​ លើសពីនោះ លោកក៏បដិសេធមិនទទួលយកឡានទំនើបសម្រាប់ការធ្វើដំណើរដែរ៕