អន្តរជាតិ
អ្នកនាំពាក្យវិមានក្រេមឡាំង៖ ប្រព័ន្ធការពារមីស៊ីល Patriot នឹងមិនជួយសម្រាលជម្លោះនៅអ៊ុយក្រែនឡើយ
× វិមានក្រេមឡាំង នៅថ្ងៃទី២២ ខែធ្នូបានលើកឡើងថា ការផ្គត់ផ្គង់ប្រព័ន្ធការពារមីស៊ីល Patriot សម្រាប់អ៊ុយក្រែន នឹងមិនជួយសម្រុះសម្រួលជម្លោះ ឬរារាំងរុស្ស៊ីក្នុងការសម្រេចបានគោលបំណងរបស់ខ្លួននោះឡើយ។ អាម៉េរិក សម្រេចផ្ដល់ប្រព័ន្ធការពារនេះឱ្យអ៊ុយក្រែនអំឡុងទស្សនកិច្ចរបស់ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី នៅទីក្រុងវ៉ាស៊ីនតោន។
ឆ្លើយតបនឹងការស្នើសុំដ៏ទទូចរបស់អ៊ុយក្រែន អាម៉េរិកក៏សម្រេចផ្ដល់ប្រព័ន្ធការពារមីស៊ីលទំនើប Patriot ដើម្បីជួយអ៊ុយក្រែនការពារខ្លួនពីការវាយប្រហារមីស៊ីលទំនើបៗរបស់រុស្ស៊ីទៅលើហេដ្ឋារចនាសម្ព័ន្ធសំខាន់របស់ខ្លួន។ មិនទុកយូរឡើយ រុស្ស៊ីបានព្រមានពីផលវិបាកនៃការសម្រេចចិត្តមួយនេះ។
«ទង្វើនេះមិនអំណោយផលសម្រាប់ការដោះស្រាយបញ្ហាឱ្យឆាប់រហ័សនោះឡើយ។ វាពិតជាផ្ទុយទៅវិញ ហើយនឹងមិនអាចរារាំងសហព័ន្ធរុស្ស៊ីពីការសម្រចបានគោលដៅរបស់ខ្លួនអំឡុងប្រតិបត្តិការពិសេសនោះឡើយ»។ អ្នកនាំពាក្យវិមានក្រេមឡាំងលោក Dmitry Peskov បានព្រមានបែបនេះក្នុងកិច្ចសន្ទនាតាមទូរស័ព្ទជាមួយអ្នកសារព័ត៌មាន រួចបន្តថា រុស្ស៊ីក៏មើលមិនឃើញពីការទទូចឱ្យស្ដារសន្តិភាព ឬក៏សញ្ញាក្នុងការស្ដាប់ពីកង្វល់របស់រុស្ស៊ីអំឡុងពេលទស្សនកិច្ចរបស់លោក ហ្សេលេនស្គី នោះឡើយ។
លោក Peskov លើកឡើថា ទង្វើទាំងអស់នេះបញ្ជាក់ពីការណ៍ដែលអាម៉េរិកកំពុងតែធ្វើសង្គ្រាមមិនផ្ទាល់ជាមួយរុស្ស៊ីទៀត ដោយប្រើប្រាស់អ៊ុយក្រែន។
គួរបញ្ជាក់ថា ប្រព័ន្ធការពារដែនអាកាស Patriot គឺជាប្រព័ន្ធការពារមីស៊ីលដ៏ទំនើបមួយរបស់អាម៉េរិកដែលអាចស្ទាក់ចាប់យន្តហោះចម្បាំង និងមីស៊ីលបាលីស្ទីកជាដើម។ ទាហានអ៊ុយក្រែននឹងហ្វឹកហាត់ប្រើប្រាស់ប្រព័ន្ធការពារនេះនៅអាល្លឺម៉ង់ក្នុងរយៈពេលប៉ុន្មានខែសិនមុននឹងដាក់ពង្រាយនៅសមរភូមិ។
ទីក្រុងមូស្កូធ្លាប់បានគំរាមថា ប្រសិនជាអ៊ុយក្រែនដាក់ពង្រាយប្រព័ន្ធការពារមីស៊ីលខាងលើ នោះវានឹងក្លាយជាគោលដៅស្របច្បាប់សម្រាប់រុស្ស៊ីវាយប្រហារ៕
© រក្សាសិទ្ធិដោយ thmeythmey.com