ជាតិ
កម្ពុជា នឹងទទួលរងឥទ្ធិពលពីបាតុភូតចំនួន២ ក្នុងដើមឆ្នាំ២០២៣ រូបភាពអាកាសធាតុនៅរាជធានីភ្នំពេញ
×
ដោយ៖ សែម ប្រាក់ដាវ
ភ្នំពេញ៖ ក្រសួងធនធានទឹក និងឧតុនិយមបានព្យាករថា នៅដើមឆ្នាំ២០២៣កម្ពុជា នឹងទទួលរងឥទ្ធិពលពីបាតុភូតចំនួនពីរ គឺ បាតុភូតអែលនីណូ (EI Nino) ២០ភាគរយនិងបាតុភូតអែនសូ (ENSO) ៨០ភាគរយ ដែលជាបាតុភូតអន្តរកាលនៅចន្លោះឡានីណានិងអែលនីណូ។ លក្ខណៈបែបនេះ អាចធ្វើឱ្យរដូវវស្សា និងរដូវប្រាំងឆ្នាំ២០២៣នេះកម្រិតបរិមាណទឹកភ្លៀង ផ្គរ រន្ទះ ពីខ្សោយទៅច្រើនបង្គួរ។
បើតាមការព្យាករអាកាសធាតុរបស់ រដូវប្រាំងឆ្នាំ២០២៣ខាងមុខ នៅក្នុងខែមករា បណ្ដាខេត្តនៅតំបន់ទំនាបកណ្ដាល សីតុណ្ហភាពមធ្យមអប្បបរមា១៨អង្សាសេ និងអតិបរមា ២៩ អង្សាសេ។ ដោយឡែក នៅតំបន់ជួរភ្នំដងរែក និងតំបន់ខ្ពង់រាបឦសាន មានសីតុណ្ហភាពអប្បបរមា អាចចុះមកក្នុងរង្វង់ពី១៥-១៧អង្សាសេ។
រដូវប្រាំងក្នុងខែកុម្ភៈ ដល់ខែមីនា សីតុណ្ហភាពអប្បបរមា ២០អង្សាសេ និងអតិបរមា ៣៣អង្សាសេ។ ចំណែក ខែមេសា សីតុណ្ហភាពអប្បបរមា ២៤អង្សាសេ និងអតិបរមា ៣៦អង្សា ប៉ុន្តែកម្រិតសីតុណ្ហភាពអតិបរមាអាចនឹងកើនឡើងដល់ ៣៩អង្សាសេផងដែរ។
ចំណែក នៅក្នុងខែមីនា និងមេសា អាចមានភ្លៀងធ្លាក់កក់ខែក្នុងកម្រិត ពីតិចទៅបង្គួរ លាយឡំជាមួយផ្គរ រន្ទះ និងខ្យល់កន្រ្កាក់ខ្លាំងផងដែរ។ការព្យាករដដែល បង្ហាញថា នៅរដូវវស្សាឆ្នាំ២០២៣ ទូទាំងប្រទេសអាចនឹងចាប់ផ្តើមនៅពាក់កណ្តាលខែឧសភា។ រីឯ តំបន់វាលទំនាប និងតំបន់មាត់សមុទ្រអាចនឹងមានភ្លៀងធ្លាក់ពីបង្គួរ ទៅច្រើន ចាប់ពីសប្តាហ៍ទី១នៃខែឧសភា។បន្ថែមពីនេះ ភ្លៀងនឹងអាចធ្លាក់រាយប៉ាយ ក្នុងកម្រិតពីតិចទៅបង្គួរ លាយឡំជាមួយផ្គររន្ទះ និងខ្យល់កន្រ្កាក់។
គួរបញ្ជាក់ផងដែរ ឆ្នាំ២០២៣ ទោះបីនៅក្នុងរដូវប្រាំង និងរដូវវស្សាអាចនឹងមានភ្លៀងធ្លាក់កក់ខែពីបង្គួរ ទៅច្រើនក្ដី ប៉ុន្តែបរិមាណទឹកភ្លៀងដែលធ្លាក់មកមិនទាន់សមល្មមនៃការប្រើប្រាស់តាមតម្រូវការភ្លាមៗនោះទេ។ ក្នុងនោះដែរ ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋ ប្រើប្រាស់ទឹកដោយសន្សំសំចៃ ជាពិសេសនៅតាមតំបន់ជនបទដាច់ស្រយាលដែលឆ្ងាយពីប្រភពទឹក សូមរក្សាប្រើប្រាស់ទឹកដោយសន្សំសំចៃ៕
Tag:
ThmeyThmey25
អាកាសធាតុឆ្នាំ២០២៣
© រក្សាសិទ្ធិដោយ thmeythmey.com