សេចក្ដីជូនដំណឹងរបស់រដ្ឋបាលខេត្តកោះកុង ដែល​ចុះហត្ថលេខា​ដោយ​លោកស្រី មិថុនា ភូថង នៅថ្ងៃទី២១ ខែធ្នូនេះ បាន​លើក​ឡើងថា ក្នុងឱកាសបុណ្យឆ្លងឆ្នាំសកលខាងមុខ នឹងមានភ្ញៀវទេសចរជាតិ និងអន្តរជាតិ ធ្វើដំណើរមកកម្សាន្តនៅតាមរមណីយដ្ឋាន សហគមន៍ទេសចរណ៍ និងតំបន់សក្ដានុពលទេសចរណ៍ជាច្រើនក្នុងខេត្តកោះកុង។ រដ្ឋបាលខេត្តកោះកុង បានស្នើដល់សណ្ឋាគារ ផ្ទះសំណាក់ អាហារដ្ឋាន និងតូបលក់អាហារនានា ត្រូវពង្រីកវិធានការអនាម័យ និងបរិស្ថានឱ្យបានល្អ។
 

ជាមួយគ្នានេះ រដ្ឋបាលខេត្តកោះកុង ក៏បានជំរុញ​ឱ្យអង្គភាពជុំវិញខេត្ត ម្ចាស់សណ្ឋាគារ ផ្ទះសំណាក់ រោងចក្រ និងអាហារដ្ឋាននានា ត្រូវយកចិត្តទុកដាក់ខ្ពស់លើកសំរាមគ្រប់ប្រភេទ កាត់ស្មៅ ពង្រាបដីឱ្យស្មើ និងលុបបំបាត់ប្លាស្ទិកនៅតាមចិញ្ចើមថ្នល់ ដើម្បីទទួលទេសចរថ្ងៃឆ្លងឆ្នាំសកល។ បន្ថែមពីនេះ នៅតាមសាលាក្រុង ស្រុក មន្ទីរ ម្ចាស់សណ្ឋាគារ ផ្ទះសំណាក់ បន្ទប់ជួល និងអាហារដ្ឋាន  ក៏ត្រូវមានការតុបតែងភ្លើងពណ៌ ដើម្បីអបអរសាទរក្នុងឱកាសចូលឆ្នាំថ្មី ឆ្នាំសកលខាងមុខនេះផងដែរ។
 

គួរបញ្ជាក់ដែរ រដ្ឋបាលខេត្តកោះកុង ក៏បានអំពាវនាវដល់អង្គភាពជុំវិញខេត្តទាំងអស់ យកចិត្តទុកដាក់ខ្ពស់ចំពោះសំរាមតាមចិញ្ចើមផ្លូវ និងសូមប្រុងប្រយ័ត្នក្នុងការបង្ការនូវគ្រោះអគ្គិភ័យដែលអាចកើតឡើងដោយថាហេតុណាមួយ៕