រយៈពេលប៉ុន្មានឆ្នាំចុងក្រោយនេះ ខេត្តកំពត ត្រូវបានគេស្គាល់ថា ជាតំបន់មួយដែលទាក់ទាញភ្ញៀវទេសចរខ្លាំងតាមរយៈអេកូទេសចរណ៍ ដែលមានចម្ការម្រេច និងចម្ការផ្លែឈើជាច្រើនប្រភេទ ជាពិសេសចម្ការទុរេន។ 

 

 

ជាមួយគ្នានេះ  ក្រសួងទេសចរណ៍ កំពុងអភិវឌ្ឍវិស័យទេសចរណ៍ក្នុងទីក្រុងកំពត ដែលគ្មានផ្សែងបារី ដើម្បីចូលរួមកសាងសេដ្ឋកិច្ចបៃតង និងសហគមន៍បៃតង។ លោក ហោ សារុន  រដ្ឋលេខាធិការក្រសួងទេសចរណ៍ លើកឡើងថា ការគិតគូរនិងយកចិត្តទុកដាក់លើផលប៉ះពាល់នានាដែលបណ្ដាលមកពីផ្សែងបារី ក្នុងវិស័យទេសចរណ៍គ្មានផ្សែងបារី ក៏ជាគោលការណ៍មួយរបស់ក្រសួង ។

 

បន្ថែមពីនេះ ទីក្រុងគ្មានផ្សែងបារី ពិតជាបានរួមចំណែកយ៉ាងសំខាន់ក្នុងការអភិវឌ្ឍវិស័យទេសចរណ៍បៃតងនៅខេត្តកំពត។  តំបន់ទេសចរណ៍ខេត្តកំពត មានលក្ខណៈពិសេស និងភាពទាក់ទាញផ្សេងៗដោយឡែកពីគ្នា។ ប៉ុន្តែបរិស្ថានគ្មានផ្សែងបារីនៅតាមទីក្រុងកំពត គឺជាលក្ខណៈសម្បត្តិរួមមួយ ដែលជួយបង្កើនភាពទាក់ទាញថែមមួយកម្រិតទៀត។

 

សូមបញ្ជាក់ដែរថា ក្រសួងទេចរណ៍ នឹងបន្តពង្រឹងទីក្រុងកំពត ជាទីក្រុងគ្មានផ្សែងបារីក្នុងស័យទេសចរណ៍ ដើម្បីខេត្តកំពត ក្លាយជាគោលដៅទេសចរណ៍ស្អាត បៃតង មានសុវត្ថិភាព និងទប់ស្កាត់ការរងផ្សែង ផលិតផលថ្នាំជក់ ដែលបង្កផលប៉ះពាល់ដល់តំបន់ទេសចរណ៍ក្នុងខេត្តកំពត ក៏ដូចជាដើម្បីទាក់ទាញទេសចរកាន់តែច្រើន៕