ជាតិ
ឆ្លងឆ្នាំ! ភ្ញៀវទេសចរជាង ២លាននាក់ ចេញដើរកម្សាន្តនៅទូទាំងប្រទេស ទិដ្ឋភាពភ្ញៀវទេសចរនាតំបន់ផាប់ស្ទ្រីត។ រូបភាព៖ អ៊ីសា រ៉ហានី
× ភ្នំពេញ៖ ភ្ញៀវទេសចរជាតិ និងអន្តរជាតិ ជាង ២លាននាក់ បានធ្វើដំណើរកម្សាន្តតាមតំបន់ទេសចរណ៍ នៅខេត្តនានាទូទាំងប្រទេស ក្នុងឱកាសពិធីបុណ្យឆ្លងឆ្នាំសកល ចូលឆ្នាំ២០២៣។ របាយការណ៍របស់ក្រសួងទេសចរណ៍ បង្ហាញថា រាជធានីភ្នំពេញ មានទេសចរច្រើនជាងគេ រហូតដល់ជាង ៤៥ម៉ឺននាក់។
ភ្ញៀវទេសចរចំនួន ២ ០២២ ៩២០នាក់ ក្នុងនោះមានភ្ញៀវទេសចរជាតិចំនួន ២ ០០៦ ១១៧នាក់ និងភ្ញៀវអន្តរជាតិ ចំនួន ១៦ ៨០៣នាក់ បានចេញដើរកម្សាន្តនៅទូទាំងប្រទេស។ បើតាមរបាយការណ៍របស់ក្រសួងទេសចរណ៍ រាជធានីភ្នំពេញ ឈរនៅលំដាប់ទី១ ដោយមានទេសចរសរុបចំនួន ៤៥៥ ៨៣២នាក់, ខេត្តព្រះសីហនុ ឈរនៅលំដាប់ទី២ ដែលមានទេសចរសរុបចំនួន ៣៣៨ ៥៥២នាក់ និងខេត្តសៀមរាប ឈរនៅលំដាប់ទី៣ មានទេសចរសរុបចំនួន ៣៣៧ ៧៦៩នាក់។
ទេសចរទៅកម្សាន្តនៅខេត្តព្រះសីហនុ។ រូបភាព៖ គី ចំណា
ក្រៅពីរាជធានី-ខេត្ត ខាងលើ ដែលមានទេសចរទៅកម្សាន្តច្រើន តួយ៉ាងខេត្ត កំពត ក៏មានភ្ញៀវទេសចរច្រើនដែរ។ ខេត្តកំពត ទទួលបានទេសចរចំនួន ៣៣០ ៦៥៩នាក់។ ដោយឡែកខេត្តបាត់ដំបងឯណោះវិញ មានទេសចរចំនួន ១៥៨ ១១០នាក់ ដែលឈរនៅលំដាប់ទី៥។
ក្រឡេកទៅមើលខេត្តនៅភាគឦសានវិញ ហាក់មិនសូវទទួលបានទេសចរច្រើននៅថ្ងៃឆ្លងឆ្នាំដូចរាជធានីភ្នំពេញ និងតំបន់សមុទ្រ។ ខេត្តរតនគិរី ទទួលបានទេសចរចំនួន ៦១២៧នាក់, ខេត្តស្ទឹងត្រែង មានចំនួន ៤៥៤០នាក់, ខេត្តមណ្ឌលគិរី មានចំនួន ៤៩៦២នាក់ និងខេត្តក្រចេះ មានចំនួន ៣០២០នាក់៕
ទិដ្ឋភាពនៅរាជធានីភ្នំពេញ នាយប់ថ្ងៃទី៣១ ធ្នូ។ រូបភាព៖ អ៊ូ សុខមាន
© រក្សាសិទ្ធិដោយ thmeythmey.com