ក្នុងកិច្ចសម្ភាសជាមួយកាសែត Chosun Ilbo ដែលចេញផ្សាយនៅថ្ងៃទី២ ខែមករា ប្រធានាធិបតីកូរ៉េខាងត្បូង លោក យូន សុកយ៉ល បានថ្លែងថា កូរ៉េខាងត្បូង កំពុងចរចាជាមួយអាម៉េរិក ក្នុងការធ្វើសមយុទ្ធយោធា ដោយមានការចូលរួមពីកងកម្លាំងនុយក្លេអ៊ែររបស់អាម៉េរិកផង ដើម្បីប្រឆាំងនឹងការគំរាមកំហែងពីសំណាក់កូរ៉េខាងជើង។

 

យ៉ាងណាមិញ កិច្ចចរចាបែបនេះ ត្រូវបានលោក ចូ បៃឌិន ប្រធានាធិបតីអាម៉េរិកឆ្លើយបដិសេធ។ ក្នុងចម្លើយទៅកាន់អ្នកសារព័ត៌មាន ដែលបានសួរជុំវិញកិច្ចចរចាខាងលើ នៅសេតវិមាន លោកបៃឌិន ថាប្រទេសទាំងពីរ មិនមានកិច្ចចរចាអ្វីឡើយ។ ប៉ុន្តែលោកបៃឌិន ក៏មិនបានបញ្ជាក់បន្ថែមនោះទេ។ 

 

ក្រោយការបញ្ជាក់ពីមេដឹកនាំអាម៉េរិក លោកស្រី Kim Eun-hye លេខាទទួលបន្ទុកកិច្ចការព័ត៌មាននៃការិយាល័យប្រធានាធិបតីកូរ៉េខាងត្បូង ក្នុងសេចក្តីថ្លែងការណ៍មួយ បានអះអាងថា នៅពេលអ្នកសារព័ត៌មានសួរសំណួរមិនច្បាស់លាស់ លោកប្រធានាធិបតីអាម៉េរិក ត្រូវតែឆ្លើយបដិសេធ។ ត្រង់ចំណុចនេះ លោកស្រី Kim បានពន្យល់ថា សមយុទ្ធនុយក្លេអ៊ែររួម ជាពាក្យប្រើប្រាស់រវាងមហាអំណាចនុយក្លេអ៊ែរ។ 

 

បើតាមមន្រ្តីការិយាល័យប្រធានាធិបតីរូបនេះ កូរ៉េខាងត្បូង និងអាម៉េរិក កំពុងចរចាលើការចែករំលែកព័ត៌មាន, ផែនការរួម និងផែនការអនុវត្តរួម ដោយមានពាក់ព័ន្ធនឹងប្រតិបត្តិការកងកម្លាំងនុយក្លេអ៊ែរ ដើម្បីឆ្លើយតបនឹងអាវុធនុយក្លេអ៊ែររបស់កូរ៉េខាងជើង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

ការបង្ហើបពីកិច្ចចរចានេះ ស្របពេលមេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យអភិវឌ្ឍមីស៊ីលបាលីស្ទិកអន្តរទ្វីបថ្មី (ICBM) និងបង្កើនការផលិតអាវុធនុយក្លេអ៊ែរ ដើម្បីប្រឆាំងនឹងការគំរាមកំហែងពីអាម៉េរិក និងប្រទេសជិតខាងកូរ៉េខាងត្បូង៕