លោក ឈីន កាង ប្រមុខការទូតចិនថ្មី នៅថ្ងៃទី៩ ខែមករា បាននិយាយទូរសព្ទជាលើកដំបូងជាមួយសមភាគីកូរ៉េខាងត្បូង លោកផាក ជីន។ ក្នុងកិច្ចសន្ទនាលើកដំបូងនេះ រដ្ឋមន្រ្តីការបរទេសទាំងពីរ បានជជែកពីការរក្សាទំនាក់ទំនងទ្វេភាគីឱ្យបានល្អប្រសើរ។ 

 

ក្នុងកិច្ចសន្ទនានោះ លោក ឈីន​ បានប្រាប់សមភាគីកូរ៉េខាងត្បូងថា ការអភិវឌ្ឍប្រកបដោយស្ថិរភាព និងល្អ នៅក្នុងទំនាក់ទំនងកូរ៉េខាងត្បូង និងចិន ជាការបម្រើប្រយោជន៍រួមឱ្យប្រទេសទាំងពីរ ហើយជាទិសដៅ ដែលភាគីទាំងពីរត្រូវបន្តខិតខំ។ ទន្ទឹមនេះ រដ្ឋមន្រ្តីការបរទេសចិន បានបន្ថែមថា លោកមានឆន្ទៈក្នុងការបង្កើត និងរក្សាទំនាក់ទំនងការងារដ៏ល្អមួយជាមួយលោក ផាកផង រួមទាំងការអនុវត្តរួមគ្នាលើកិច្ចព្រមព្រៀងដែលដាក់ចេញដោយមេដឹកនាំរបស់ចិន និងកូរ៉េខាងត្បូងនាពេលកន្លងមក។ 

 

ជាការឆ្លើយតប លោកផាក បានអបអរលោក ឈីន ដែលបានក្លាយជារដ្ឋមន្រ្តីការបរទេសចិនថ្មី ហើយថែមទាំងយល់ឃើញដូចលោក ឈីន ដែរ ជុំវិញការអភិវឌ្ឍទំនាក់ទំនងទ្វេភាគី។ នេះបើតាមការចុះផ្សាយរបស់ទូរទស្សន៍ CGTN។ 

 

ទន្ទឹមនេះ ប្រមុខការទូតកូរ៉េខាងត្បូង បានបង្ហាញក្តីសង្ឃឹមថា ប្រទេសជិតខាងទាំងពីរ នឹងឈានដល់យុគថ្មីលើកិច្ចសហប្រតិបត្តិការ និងការគោរពគ្នាទៅវិញទៅមក។​

 

មិនតែប៉ុណ្ណោះ លោក ឈីន​ បានបង្ហាញពីក្តីបារម្ភជុំវិញការរឹតត្បិតរបស់កូរ៉េខាងត្បូង លើអ្នកដំណើរចិន ដែលចូលក្នុងប្រទេស ទាក់ទិននឹងជំងឺកូវីដ-១៩ ។ បើតាមរដ្ឋមន្រ្តីការបរទេសចិន កូរ៉េខាងត្បូង គួរប្រកាន់យកហេតុផលដោយផ្អែកលើវិទ្យាសាស្រ្ត៕