«គិតអីរាល់ថ្ងៃហ្នឹង? ចង់ល្បី? ខ្លាចបាត់ឈ្មោះ? ខ្លាចគេភ្លេច? ឬចង់ល្បីដោយសារសត្វ?»។ នេះជាចម្ងល់បែបសើចចំអករបស់ម្ចាស់សំណេរនៃទំព័រ Pets Cambodia ដោយចាត់ទុកសកម្មភាពសំដែងរបស់នាយគ្រឿន ជាទង្វើដែលមិនអាចទទួលយកបាន។

 

«ចូរគិតមុនគូរ»។ ហ្វេសប៊ុក Pets Cambodia បានសរសេរយ៉ាងដូច្នេះ។ ក្រោយការបង្ហោះកាលពីយប់ថ្ងៃទី៦ ខែកុម្ភៈ អ្នកប្រើប្រាស់បណ្តាញសង្គមមួយចំនួន បាននាំគ្នាបន្ទរចំពោះការលើកឡើងខាងលើ ដោយចាត់ទុកសកម្មភាពតារាកំប្លែងល្បីល្បាញរូបនេះ ថា ប្រមាថជីវិតសត្វ។

 

ទំនងជាបានឃើញនូវអ្វីដែលរិះគន់ទៅលើខ្លួន នាយគ្រឿង នាព្រឹកថ្ងៃទី៧ ខែកុម្ភៈនេះ បានសរសេរសារសូមទោស និងព្យាយាមពន្យល់ហេតុផលមួយចំនួន។ «សូមទោសបងប្អូនខ្ញុំដឹងខុសហើយនូវការសំដែងលេងយួរឆ្មាភ្លេចខ្លួន នឹកឃើញថាប្រឡៅកឆ្មាធំដែរយួរមួយភ្លែត វាមិនអី»។

 

នាយគ្រឿន បានអះអាងថា ខ្លួនមិនស្រឡាញ់ ហើយក៏មិនស្អប់ឆ្មានោះដែរ។ តារាកំប្លែងរូបនេះ ថា បើម្ចាស់ឆ្មាមិនសប្បាយចិត្ត គាត់អាចប្តឹង ឬឱ្យគាត់សូមទោសឆ្មា ក៏ព្រម។ «តែខ្ញុំអន់ចិត្តមានបងប្អូន ប្រមាថជីវិតខ្ញុំ តែមិនអីទេខ្ញុំធ្វើបុណ្យបានខ្លះដែរ បើមានជាតិក្រោយសូមកើតជាសត្វទៅនៅភពផ្សេង»។ នេះជាការលើកឡើងរបស់នាយគ្រឿន។

 

ទន្ទឹមនឹងមានអ្នកថ្កោលទោសសកម្មភាព រួមទាំងអ្នកប្រមាថជីវិតនាយគ្រឿន មានមតិយោបល់មួយចំនួនបានលើកឡើងថា អ្នកខ្លះបង្ហាញសកម្មភាពដ៏ល្អចំពោះសត្វនៅលើបណ្តាញសង្គម ប៉ុន្តែសកម្មភាពខាងក្រៅខុសពីការពិត ជាពិសេសកង្វះការយកចិត្តទុកដាក់ចំណីបាយទឹក៕