នៅក្នុងកិច្ចប្រជុំត្រួតពិនិត្យវឌ្ឍនភាពការងារដែលនៅសេសសល់ នាថ្ងៃទី៨ ខែកុម្ភៈ នៅសាលប្រជុំពហុកីឡដ្ឋានជាតិមរតកតេជោ លោក វ៉ាត់ ចំរើន អគ្គលេខាធិការ CAMSOC បានរៀបរាប់ថា កិច្ចប្រជុំគឺផ្តោតសំខាន់លើការងារបច្ចេកទេសរវាង សហព័ន្ធកីឡាជាតិ, CAMSOC និងសហព័ន្ធកីឡាអន្តរជាតិ ធ្វើយ៉ាងណាសហការគ្នារៀបចំការប្រកួតកីឡានីមួយៗប្រកបដោយភាពរលូន និងស្របតាមស្តង់ដារអន្តរជាតិ។

 

លោក វ៉ាត់ ចំរើន បានបន្ថែមថា សហព័ន្ធកីឡាជាតិត្រូវមាននាយកបច្ចេកទេសប្រចាំការ និងទួលខុសត្រូវក្នុងការបញ្ជាការងារទាំងអស់នៅក្នុងការប្រកួត ហើយស្របពេលគ្នានេះគណៈកម្មាធិការជាតិ CAMSOC បានទម្លាក់ថិវការទៅនាយកបច្ចេកទេស ដើម្បីបំពេញការងាររដ្ឋបាល តាមប្រភេទកីឡានីមួយៗរួចរាល់ហើយ។

ការទម្លាក់ថវិការទៅកាន់នាយកបច្ចេកទេស ដើម្បីពន្លឿន និងពង្រឹងសកម្មភាពរបស់កីឡានីមួយៗ ឲ្យមានកម្លាំងចិត្ត ក្នុងការរៀបចំ នឹងដំណើរការល្អ ដើម្បីទទួលបានជោគជ័យនៅព្រឹត្តិការណ៍ស៊ីហ្គេមលើកទី៣២ ដែលនឹងឈានមកដល់ក្នុងខែឧសភា ខាងមុខនេះ។

 

អគ្គលេខាធិការ CAMSOC បន្ថែមថា លោក ថោង ខុន បានណែនាំឲ្យនាយកបច្ចេកទេសដែលមានឈ្មោះជាមន្រ្តីរបស់ CAMSOC សម្រាប់ធ្វើការលើផ្នែកបច្ចេកទេស និងដឹកនាំលើការប្រកួតតាមប្រភេទកីឡានីមួយៗ ត្រូវធ្វើការងារជាមួយសហព័ន្ធអន្តរជាតិ ដែលមានបច្ចេកទេសស្តង់ដាអន្តរជាតិ ដើម្បីយល់ដឹងឱ្យបានច្បាស់ពីបទបញ្ជាការប្រកួតអន្តរជាតិ៕