«ការប្រកួតរវាង Thiago និងធារ៉ា គឺល្អតែយើងត្រូវកែតម្រូវចំណុចមួយចំនួនទៀត។ ពេលដ៏ខ្លីសម្រាប់ការហាត់សមរបស់ពួកយើង យើងនឹងវិលមកប្រទេសកម្ពុជាសាជាថ្មី ដើម្បីប្រកួតជាមួយ ធារ៉ា យើងនឹងឈ្នះ»។ កីឡាករជនជាតិប្រេស៊ីល Rafael ផ្តល់បទសម្ភាសផ្ទាល់ដល់សារព័ត៌មានថ្មីៗដូច្នេះ នាព្រលានយន្តហោះអន្តរជាតិភ្នំពេញ មុនពេលរូបគេទាំងពីរនាក់បងប្អូន ត្រៀមចេញដំណើរពីទឹកដីកម្ពុជា ទៅកាន់កោះសាម៊ុយ ប្រទេសថៃវិញ នៅថ្ងៃទី១៣ ខែកុម្ភៈ។
 

ពេលវិលទៅទឹកដីថៃវិញនេះ Rafael ថា ខ្លួននឹងប្រឹងប្រែងហ្វឹកហាត់បន្ថែម ដើម្បីវិលត្រលប់មកសងសឹក ធឿន ធារ៉ា ម្តងទៀត ។

 

យ៉ាងណាការមកកាន់ទឹកដីកម្ពុជា របស់កីឡាករសញ្ជាតិប្រេស៊ីល Thiago Teixeira បានធ្វើឱ្យអ្នកគាំទ្រកម្ពុជាពេញចិត្តជាខ្លាំង នឹងមានការសុំថតរូបនៅមុខព្រះបរមរាជវាំងផងដែរ។ Thiago ក៏បានបង្ហើបប្រាប់ផងដែរថា ថ្ងៃណាមួយគេនឹងបើកក្លិបប្រដាល់ដែលដាក់ឈ្មោះថា«សាម៊ុយ គុនខ្មែរ» នៅទឹកដីថៃ។

 

គួបញ្ជាក់ដែរថា កីឡាករ Rafael អ្នកប្រយុទ្ធក្នុងទ្រុងជាបងប្រុសរបស់កីឡាករ Thiago ដែលតែងតែចាំជួយ និងនៅក្បែរ Thiago ដោយការលើកទឹកចិត្តគ្រប់ឧបសគ្គ ។ ពីឆ្នាំ២០១៦-២០១៨ Thiago ធ្លាប់មានបញ្ហាផ្លូវចិត្ត គឺបាន Rafael ជាអ្នកជួយលើកទឹកចិត្ត និងជំរុញឱ្យចូលប្រឡូកលើសង្វៀនសាជាថ្មី។ នេះបើតាមការបញ្ជាក់ពីកីឡាករ Thiago៕