លោក អេ ភូថង បានអរគុណអ្នកគាំទ្រ ធឿន ធារ៉ា ក្នុងការផ្ញើរ និងបង្ហោះវីឌីអូប្រកួតរបស់កីឡាករ Thiago ជាមួយកីឡាករថៃ នៅលើបណ្ដាញហ្វេសប៊ុក។ ក្រោយមើលវីឌីអូនេះ គ្រូបង្វឹករូបនេះ បានកែក្បាច់ឲ្យ ធឿន ធារ៉ា ដើម្បីត្រៀមប្រកួតជាមួយ Thiago។ លោក អេ ភូថង  បញ្ជាក់ថា កីឡាករប្រេស៊ីលប្រើ ដៃស្ដាំ មិនសូវល្អដូចដៃឆ្វេងទេ ប៉ុន្ដែការប្រកួតរបស់ Thiago ស្ទុះល្អគ្រប់ទឹក។ 
  

 

លោក អេ ភូថង និយាយថា៖«ពេលដែលបងប្អូន បង្ហោះឲ្យខ្ញុំមើល ខ្ញុំ បានមកកែក្បាច់ឲ្យ ធឿ ធារ៉ា។ ខ្ញុំដឹងថា Thiago នេះ ពូកែប្រើដៃដែរ ប៉ុន្ដែដៃស្ដាំ មិនសូវខ្លាំងទេ ចំណែកដៃឆ្វេង គឺដៃខាងមុខ គាត់វាយបានល្អណាស់។ គាត់ល្អតែដៃឆ្វេង ១ទេ ប៉ុន្ដែស្ទុះគាត់ល្អ។ គាត់វាយមួយតឹក ដឹងមួយតឹក។»។
 

នៅមុនជំនួបទល់ធឿន ធារ៉ា Thiago បានបញ្ជាក់លើវីឌីអូខ្លួន ថាប្រយ័ត្ន និងការពារកែងរបស់ ធារ៉ា។ ដោយឡែកអំឡុងពេលប្រកួត នាចុងតឹកទី៤ កីឡាករប្រេស៊ីលនេះ នៅតែចាញ់ក្រោមកែងរបស់ កីឡាករកម្ពុជាដដែរ។ ជុំវិញជ័យជម្នះនេះ លោក អេ ភូថង បានពន្យល់ថា ធារ៉ា ប្រើដៃវាយច្រើនទៅលើគូប្រកួត រង់ចាំដល់ពេលគូប្រកួតប្រហែស ទើបវាយកែងតែម្ដង។ ប៉ុន្ដែ ការវាយបែបនេះ ត្រូវការពេលវេលា មិនអាចចេះតែប្រើៗ មិនត្រូវចំណុចទេ ព្រោះអាចធ្វើឲ្យគូប្រកួតចាប់ក្បាច់បាន។
  

 

«ធម្មតាគេ បារម្ភខ្លាចកែង។ អ៊ីចឹងតឹកទី១ យើង កុំវាយកែង យើងគ្រាន់តែបញ្ឆោត ហើយយើងប្រើកណ្ដាប់ដៃវិញ។ យើង ធាក់ឲ្យបានច្រើន ប្រើកណ្ដាប់ដៃឲ្យបានច្រើន។ ខ្ញុំ ប្រាប់គាត់ថា តឹកទី១ យើងសម្រុកទៅ យើងអស់កម្លាំងច្រើន។ តឹកទី២ យើងបន្ថូរ ហើយទឹកទី៣ យើងបន្ថូរដែរ គ្រាន់តែវាយឲ្យលើសគេបន្ដិច កុំឲ្យពិន្ទុគេ នៅលើយើង។ ធ្វើយ៉ាងមិចក៏ដោយ ឲ្យពិន្ទុលើសគេ។ ហើយតឹកទី៤ ខ្ញុំនិយាយថា វាយបណ្ដោយទៅ វាយកែងទៅ។ ខ្ញុំប្រាប់ធឿន ធារ៉ា ពេលចូលវាយ ត្រូវមានម៉ាត់ មានកែង ហើយសម្រុកទៅ។»។ លោក អេ ភូថង បានពន្យល់ដូច្នេះ។
 

គួរបញ្ជាក់ថា កាលពីយប់ថ្ងៃសៅរ៍ទី១១ ខែកុម្ភៈ កីឡាករ ធឿន ធារ៉ា បានផ្ដួល កីឡាករ Thiago Teixeira ដោយការប្រើកែងវាយចំក្បាល និងត្រូវអាជ្ញាកណ្តាលបញ្ឈប់ការប្រកួតក្នុងតឹកទី៤ នៅសង្វៀន នៅស្វាយរៀង៕