ក្នុងកិច្ចសម្ភាសជាមួយកាសែត  BILD am Sonntag​ ចេញផ្សាយនៅថ្ងៃទី១២ ខែមីនា លោក Dmytro Kuleba រដ្ឋមន្រ្តីការបរទេសអ៊ុយក្រែន បានអះអាងថា កង្វះគ្រាប់កាំភ្លើង ជាបញ្ហាសំខាន់ទីមួយ ក្នុងការប្រឆាំងរបស់អ៊ុយក្រែន ទល់នឹងរុស្ស៊ី។ 

 

ប្រមុខការទូតអ៊ុយក្រែនរូបនេះ បានអះអាងថា​ ក្រុមហ៊ុនផលិតអាវុធអាល្លឺម៉ង់បានប្រាប់លោកពីការត្រៀមខ្លួនរួចរាល់ក្នុងការបញ្ជូនគ្រាប់កាំភ្លើងឱ្យអ៊ុយក្រែន ប៉ុន្តែវារង់ចាំរដ្ឋាភិបាលអាល្លឺម៉ង់ ចុះហត្ថលេខាលើ។ 

 

«ដូច្នេះបញ្ហា គឺស្ថិតលើរដ្ឋាភិបាលអាល្លឺម៉ង់»។ លោក Kuleba បានសង្កត់ធ្ងន់បែបនេះ ដោយបន្តថា អ៊ុយក្រែន មិនបានរំពឹងពីការទទួលបានយន្តហោះចម្បាំងពីលោកខាងលិចឡើយ ប៉ុន្តែរដ្ឋាភិបាលក្រុងកៀវសង្ឃឹមថា អ្នកបើកបរយន្តហោះចម្បាំងអ៊ុយក្រែន គួរតែត្រូវបានហ្វឹកហ្វឺន។ 

 

ក្នុងកិច្ចសម្ភាសដាច់ដោយឡែកមួយទៀត លោក Kuleba ក៏បានបញ្ជាក់ពីការមិនដកទ័ពចេញពីក្រុង Bakhmut ដែលរុស្ស៊ីកំពុងវាយប្រហារផង។ ត្រង់ចំណុចនេះ ប្រមុខការទូតអ៊ុយក្រែន បានពន្យល់ថា ប្រសិនបើរុស្ស៊ី ទទួលបានក្រុង Bakhmut ក្រុងផ្សេងទៀតនៅពីក្រោយនឹងត្រូវរងគ្រោះ ហើយរុស្ស៊ីនៅតែបន្តវាយប្រហារក្រុងទាំងនោះ៕