នៅសប្តាហ៍មុន សភាប្រជាជនចិន បានបោះឆ្នោតរើសលោកស៊ី ជិនភីង ជាប្រធានាធិបតីចិនសម្រាប់អាណត្តិទី៣ ដែលមានរយៈពេល ៥ឆ្នាំ។ លោកស៊ី បានក្លាយជាមេដឹកនាំចិនលើកដំបូង ដែលកាន់អំណាចបាននៅអាណត្តិទីបី ចាប់តាំងពីលោកម៉ៅ សេទុង។ 

 

ក្រោយកការកាន់តំណែងជាប្រធានាធិបតីជាថ្មី លោកស៊ី បានប្តេជ្ញាការពារសន្តិសុខជាតិ និងអធិបតេយ្យ ក្នុងពិធីបិទកិច្ចប្រជុំសភា ដែលបានបើកកិច្ចប្រជុំជាង ១សប្តាហ៍ ដើម្បីពិនិត្យលើគោលនយោបាយរដ្ឋាភិបាលនៅអាណត្តិមុន ដាក់ចេញគោលនយោបាយថ្មី និងបោះឆ្នោតតែងតាំងថ្នាក់ដឹកនាំរដ្ឋាភិបាលចិនថ្មីជាដើម។ 

 

«យើងត្រូវតែលើកតម្កើងការធ្វើទំនើបកម្មកម្លាំងប្រដាប់អាវុធ និងការពារជាតិ រួមទាំងអភិវឌ្ឍកម្លាំងប្រដាប់អាវុធរបស់ប្រជាជនឱ្យក្លាយជាមហាកំពែងដែក ដែលមានប្រសិទ្ធភាពការពារសន្តិសុខ និងអធិបតេយ្យជាតិ រួមទាំងផលប្រយោជន៍នៃការអភិវឌ្ឍ»។ លោកស៊ី បានសង្កត់ធ្ងន់បែបនេះ នៅថ្ងៃទី១៣ ខែមីនា។

 

ទន្ទឹមនេះ មេដឹកនាំចិន បានអំពាវនាវឱ្យមានការថែរក្សាស្ថិរភាព និងការបង្រួបបង្រួមជាមួយដែនកោះតៃវ៉ាន់ផង។ ត្រង់ចំណុចនេះ លោកស៊ី បានចាត់ទុកភាពទុកចិត្តរបស់ប្រជាជនជាអម្រែកដ៏ធ្ងន់ចំពោះលោក។ 

 

លោកស៊ី​ បានបញ្ជាក់ពីការលើកតម្កើងការអភិវឌ្ឍប្រកបដោយសន្តិភាពឆ្លងច្រកសមុទ្រតៃវ៉ាន់ រួមទាំងជំទាស់ការជ្រៀតជ្រែកពីកម្លាំងបរទេស និងការប្រកាសឯករាជ្យរបស់តៃវ៉ាន់។ 

 

សូមបញ្ជាក់ថា ក្នុងសុន្ទរកថាក្នុងពិធិបិទកិច្ចប្រជុំសភានេះ ប្រធានាធិបតីចិន ក៏បានថ្លែងពីការអភិវឌ្ឍប្រទេស ការចាត់ទុកប្រជាជនជាអាទិភាព និងភាពដឹកនាំរបស់បក្សកុម្មុយនីស្តចិនផង៕