ប្រធានប្រតិភូកនាំក្រុមកីឡាករបាល់ទះក្នុងសាលកម្ពុជា បង្ហាញអារម្មណ៍សោកស្តាយចំពោះបរាជ័យនាការប្រកួតបើកឆាកទល់ក្រុមម្ចាស់ផ្ទះម៉ាឡេស៊ី។ លោក អាំង សិរីពិសិដ្ឋ អគ្គេលេខាធិការសហព័ន្ធកីឡាបាល់ទះកម្ពុជា បានសរសេរសារបង្ហោះនៅលើបណ្តាញសង្គមហ្វេសប៊ុកផ្លូវការរបស់ខ្លួនថា៖«សុំទោសបងប្អូនជនរួមជាតិ ថ្ងៃនេះពួកយើងពិតជាធ្វើមិនបានល្អសោះ»។ យ៉ាងណាលោក សិរីពិសិដ្ឋ បន្ថែមថាក្រុមនឹងប្រឹងប្រែងធ្វើឱ្យបានល្អវិញនៅក្នុងការប្រកួតទល់នឹងក្រុមសិង្ហបុរី។

 

លោក អាំង សិរីពិសិដ្ឋ សង្ឃឹមថានៅជំនួបបន្ទាប់ នាថ្ងៃទី៣០ ខែមីនា ក្រុមកម្ពុជានឹងធ្វើបានល្អប្រសើរវិញទល់សិង្ហបុរី។ ទោះបីជាបរាជ័យក្រោមថ្វីដៃម្ចាស់ផ្ទះម៉ាឡេស៊ី ៣-០សិត នូវជំនួបដំបូងរបស់ខ្លួនក៏ពិតមែនតែក្រុមបាល់ទះជម្រើសជាតិកម្ពុជា នៅមានភារកិច្ចបន្តត្រូវតទល់ក្រុមខ្លាំងសិង្ហបុរី នៅថ្ងៃទី៣០ ខែមីនា ឆ្នាំ២០២៣ និងក្រុមម្ចាស់ផ្ទះម៉ាឡេស៊ី(B)។ កម្ពុជា​ ត្រូវការឈ្នះទាំងពីរប្រកួតចុងក្រោយ ដើម្បីឈានដល់វគ្គដណ្តើមពាន Tri-Nation នេះ។
 

ក្រុមម៉ាឡេស៊ី(B) ចាញ់ក្រុមសិង្ហបុរីក្នុងលទ្ធផល ៣-០ សិត សម្រាប់ជំនួបដំបូងរបស់ពួកគេ។ ក្រុមម៉ាឡេស៊ី(B) ត្រូវបន្តជួបក្រុមម៉ាឡេស៊ីឈុតស៊ីហ្គេមដែលឈ្នះកម្ពុជា នៅជំនួបទី២។
 

នៅក្នុងសិតទី១ កម្ពុជា ចាញ់ម្ចាស់ផ្ទះម៉ាឡេស៊ី ដោយលទ្ធផលពិន្ទុប្រផិតប្រផើយប្រដេញគ្នា ២៨-២៦ បន្តក្នុងសិតទី២ កម្ពុជា ចាញ់ដោយលទ្ធផល ២៥-២១ និងបន្តចាញ់នៅសិតទី៣ ដោយលទ្ធផលដាច់ឆ្ងាយ ២៥-១២។ យ៉ាងណាកម្ពុជា នៅបន្តបេសកម្មរបស់ខ្លួនមួយប្រកួតទៀតមុនត្រៀមខ្លួនជួបក្រុមបាល់ទះយក្សចិន និងការប្រកួតកីឡាស៊ីហ្គេម២០២៣។

 

គួបញ្ជាក់ថា ការប្រកួតបាល់ទះក្នុងសាលពានរង្វាន់ Tri-Nation រវាងកម្ពុជា និងសិង្ហបុរី នឹងចាប់ផ្តើមពីម៉ោង៧ និង៣០នាទីល្ងាច ថ្ងៃទី៣០ ខែមីនា ឆ្នាំ២០២៣ នាទីលានបាល់ទះក្នុងសាលសាល MBSA Indoor Volleyball Hall ក្នុងក្រុងគូឡាឡាំពួ ប្រទេសម៉ាឡេស៊ី៕