នាពិធីសំណេះសំណាលជាមួយកីឡាករ-កីឡាការិនីប្រដាល់សកលជម្រើសជាតិកម្ពុជា ថ្ងៃទី២៩ ខែមីនា ឆ្នាំ២០២៣ នៅទីស្នាក់ការគណៈកម្មាធិការកីឡាអូឡាំពិក(NOCC) លោក ខេស៊ី បាណេត​ អនុប្រធានសហព័ន្ធកីឡាប្រដាល់សកលកម្ពុជា លើកឡើងថា ការប្រកួតកីឡាស៊ីហ្គេមនៅកម្ពុជាកាន់តែកៀកខិតជិតមកដល់ហើយ ដូច្នេះសង្ឃឹមអត្តពលិកយកចិត្តទុកដាក់ និងប្រឹងប្រែងទាំងអស់គ្នា អំឡុងពេលហ្វឹកហាត់នៅប្រទេសកាហ្សាក់ស្ថាន។

 

លោក ខេស៊ី បាណេត និយាយថា៖«សូមជូនពរក្នុងការហ្វឹកហាត់នៅកាហ្សាក់ស្ថានជាពិសេសនេះជាឱកាសល្អក្នុងការបង្កើនជំនាញ សមត្ថភាព។ សូមអ្នកទាំងអស់គ្នាខិតខំស្តាប់គ្រូដែលមានជំនាញ និងប្រឹងប្រែងវិភាគលើចំណុចខ្សោយរបស់ខ្លួន ថាគួរកែកន្លែងណា»។ លោក ខេស៊ី បន្ថែមថាការចេញទៅហ្វឹកហាត់នៅកាហ្សាក់ស្ថានកីឡាករ-កីឡាការិនី នឹងទទួលបានយុទ្ធសាស្ត្រល្អៗច្រើនពីគ្រូមានបច្ចេកទេស។

 

គួបញ្ជាក់ថា​ អត្តពលិក គ្រូបង្វឹកកីឡាប្រដាល់សកលកម្ពុជាចេញទៅហ្វឹកហាត់រយៈពេលមួយខែនៅប្រទេសកាហ្សាក់ស្ថាន ក្នុងនោះកីឡាករ១១នាក់ កីឡាការិនី៥នាក់ និងគ្រូបង្វឹក៣នាក់ ហើយនឹងត្រូវចេញដំណើរនៅថ្ងៃទី៣០ ខែមីនា ឆ្នាំ២០២៣៕