លោកអគ្គលេខាធិការ បញ្ជាក់បន្ថែមទៀតថាការទទួលបានលទ្ធផលល្អនេះជាជំហានថ្មីមួយឆ្ពោះទៅរកភាពជោកជ័យក្នុងការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ «កម្ពុជា យើងកាន់តែមានក្តីរំពឹង ហើយសង្ឃឹមថាវិញ្ញាសាបាល់ទះឆ្នេរខ្សាច់យើងអាចនឹងទទួលបានមេដាយជាក់ជាមិនខាន»។ លោក អាំង សិរីពិសិដ្ឋ រំពឹងថាអត្តពលិកនឹងប្រឹងប្រែងហើយរក្សាគុណផលល្អរហូតទៅ។ 

 

យ៉ាងណាលោកអគ្គលេខាធិការជឿជាក់ថាប្រជាពលរដ្ឋកម្ពុជា នឹងមានការគាំទ្រឱ្យបានច្រើនកុះករដើម្បីលើកទឹកចិត្តដល់កីឡាករកម្ពុជាក្នុងការប្រកួតកីឡាស៊ីហ្គេម ហើយលោកចាត់ទុកថាអ្នកគាំទ្រគឺជាកីឡាករទី៣ ដែលនៅក្រៅទីលានប្រកួត។ ការលើកទឹកចិត្តគឺមានសារៈសំខាន់ ក្នុងការជំរុញទឹកចិត្តឱ្យកីឡាករមានកម្លាំងចិត្តប្រកួតយកជ័យជម្នះជូនជាតិ។

 

លោក អាំង សិរីពិសិដ្ឋ ក៏បាននិយាយលើកទឹកចិត្តបន្ថែមទៅកាន់អត្តពលិកក្រុមបាល់ទះឆ្នេរខ្សាច់កម្ពុជាថា ត្រូវពង្រឹង និងកែលម្អនូវចំណុចខ្សោយរបស់ខ្លួន ទាំងការវាយសេវា ការលោតធ្វើរនាំង ហើយកុំខ្លាចរអាចំពោះកាយសម្បទារបស់គេ។ 

 

មន្រ្តីសហព័ន្ធកីឡាបាល់ទះរូបនេះ សង្កត់ធ្ងន់ថា៖«អ្នកប្រយុទ្ធដែលខ្លាំងគឺមិនដែលខ្លាច ចំពោះកាយសម្បទាគូប្រកួតឡើយ»។ លោក សិរីពិសិដ្ឋ ក៏បានរំលឹកអត្តពលិកកុំធ្វេសប្រហែស និងត្រូវយកចិត្តទុកដាក់ហ្វឹកហាត់ឱ្យបានខ្លាំងក្លាព្រោះការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា សល់ពេលត្រឹមជាងម្ភៃថ្ងៃទៀតប៉ុណ្ណោះ៕