យោធាមីយ៉ាន់ម៉ា បានឯកភាពលើការចំណាយរបស់ជាតិសម្រាប់ឆ្នាំ២០២៣-២០២៤ ក្នុងទំហំប្រមាណ ៩,៥ពាន់លានដុល្លារ (២០ទ្រីលានKyats)។ ក្នុងការចំណាយប្រចាំឆ្នាំនេះ មីយ៉ាន់ម៉ា គ្រោងពង្រឹងយោធា ជាមួយទំហំថវិការដ៏ច្រើនសន្ធឹកសន្ធាប់ ខណៈការចំណាយលើវិស័យអប់រំ មានមិនដល់ពាក់កណ្តាលនៃការចំណាយលើយោធាឡើយ។ 

 

តាមការចុះផ្សាយរបស់សារព័ត៌មាន The Irrawaddy នៅថ្ងៃទី១០ ខែមេសា មីយ៉ាន់ម៉ា នឹងចំណាយ ២,៧ពាន់លានដុល្លារលើយោធា ពោលគឺកើនឡើងប្រមាណ ១ពាន់លានដុល្លារ បើធៀបនឹងឆ្នាំមុន។ នៅក្នុងឆ្នាំ២០២២ ថវិកាការពារជាតិមីយ៉ាន់ម៉ា មានទំហំ១,៧ពាន់លានដុល្លារប៉ុណ្ណោះ មុនពេលយោធាបានបន្ថែមជាង២០០លានដុល្លារ នៅក្នុងខែធ្នូ។ 

 

យ៉ាងណាមិញ ការចំណាយលើវិស័យអប់រំ មានមិនដល់ពាក់កណ្តាលនៃទំហំចំណាយលើយោធាឡើយ។ ក្នុងការចំណាយរបស់ជាតិនៅឆ្នាំ២០២៣-២០២៤ វិស័យអប់រំមានចំនួន៩៥១លានដុល្លារប៉ុណ្ណោះ ខណៈវិស័យសុខាភិបាលមាន ៣៨០លានដុល្លារ។ 

 

ការដំឡើងថវិកាសម្រាប់យោធាដ៏ច្រើនសន្ធឹកបែបនេះ ធ្វើឡើងក្រោយលោក មីន អ៊ុងឡាំង មេដឹកនាំយោធា នៅក្នុងខែមីនាកន្លងទៅ ប្តេជ្ញាស្តារស្ថិរភាពនៅក្នុងប្រទេសឡើងវិញ រួមទាំងប្រឆាំងនឹងក្រុមបះបោរនៅក្នុងប្រទេស មុននឹងរៀបចំការបោះឆ្នោត។ បើទោះផលិតអាវុធមួយចំនួនក៏ដោយ ប៉ុន្តែមីយ៉ាន់ម៉ា នៅតែបន្តនាំចូលអាវុធទំនើបៗពីចិន និងរុស្ស៊ី។

 

សូមបញ្ជាក់ថា មកទល់ពេលនេះ មីយ៉ាន់ម៉ា នៅតែបន្តប៉ះទង្គិចជាមួយកម្លាំងប្រដាប់អាវុធរបស់រដ្ឋាភិបាលស្រមោលមីយ៉ាន់ម៉ា និងកម្លាំងប្រដាប់អាវុធជនជាតិភាគតិច បើទោះមានការអំពាវនាវពីសំណាក់សមាជិកអាស៊ាន ឱ្យចូលតុចរចា ដើម្បីដោះស្រាយវិបត្តិនយោបាយក្នុងប្រទេសក៏ដោយ៕