ហ្វីពីលីន និងអាម៉េរិក ត្រូវដឹកនាំសមយុទ្ធយោធាដ៏ធំបំផុត ដែលនឹងចាប់ផ្តើមពីថ្ងៃទី១១ ដល់ថ្ងៃទី២៨ ខែមេសាខាងមុខ។ សមយុទ្ធ ដែលមានកម្លាំងយោធាចូលរួមប្រមាណ  ១៧៦០០នាក់នេះ នឹងបង្ហាញពីកម្លាំងយោធារបស់អាម៉េរិក នៅក្នុងតំបន់ ស្របពេលចិន កំពុងអុងអាត់ក្នុងតំបន់។ 

 

សមយុទ្ធនេះ ត្រូវបានដាក់ឈ្មោះថា «Balikatan» ដោយមានន័យថា ស្មាទល់នឹងស្មា ក្នុងភាសាហ្វីលីពីន។  Balikatan នឹងមានទាំងសមយុទ្ធបាញ់គ្រាប់ពិតនៅក្នុងសមុទ្រចិនខាងត្បូង ដែលចិនទាមទារស្ទើរតែ ៩០ភាគរយ។ នេះជាលើកដំបូងដែលសមយុទ្ធរួមគ្នានេះមានលំហាត់បាញ់គ្រាប់ពិតដែរ។

 

បន្ថែមពីនេះ វាក៏មានសមយុទ្ធចុះចតឧទ្ធម្ភាគចក្រនៅកោះហ្វីលីពីនមួយ ក្បែរកោះLuzon ដែលមានចម្ងាយប្រមាណ ៣០០គីឡូម៉ែត្រពីតៃវ៉ាន់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

«ដើម្បីឱ្យយើងការពារអធិបតេយ្យដែនដី យើងត្រូវតែធ្វើសមយុទ្ធ ដែលត្រូវដណ្តើមយកកោះ មកវិញពីប្រទេសណាមួយអាចយកពីយើង»។ វរសេនីយ៍ឯក Michael Logico អ្នកនាំពាក្យនៃសមយុទ្ធយោធាហ្វីលីពីន បានបញ្ជាក់ទៅកាន់អ្នកសារព័ត៌មានបែបនេះ នៅថ្ងៃទី១១ ខែមេសា បន្ទាប់ពីពិធីបើកសមយុទ្ធយោធា នៅបន្ទាយយោធាមួយ ក្នុងក្រុងម៉ានីល។

 

សមយុទ្ធយោធាខាងលើ ជាលើកដំបូងនៅក្នុងរដ្ឋបាលរបស់លោក Ferdinand Marcos ប្រធានាធិបតីហ្វីលីពីន ដែលស្វះស្វែងរកការពង្រឹងទំនាក់ទំនងជាមួយអាម៉េរិក ស្របពេលខ្លួនកំពុងមានជម្លោះដែនទឹកក្នុងសមុទ្រចិនខាងត្បូងជាមួយចិន។ កន្លងមក ហ្វីលីពីន បានអនុញ្ញាតឱ្យអាម៉េរិកប្រើមូលដ្ឋានយោធាខ្លួនដែលនៅជាប់សមុទ្រចិនខាងត្បូង ចំនួន៤។ 

 

កម្លាំងយោធាអាម៉េរិកចំនួន ១២២០០នាក់ ខណៈហ្វីលីពីនចំនួន ៥៤០០នាក់ នឹងចូលរួមសមយុទ្ធ«Balikatan»។ បន្ថែមពីនេះ យោធាអូស្រ្តាលីច្រើនជាង ១០០នាក់ ក៏បង្ហាញវត្តមាន ក្នុងសមយុទ្ធយោធាប្រមាណ ២សប្តាហ៍នេះដែរ។ អាម៉េរិក នឹងបង្ហាញពីអាវុធទំនើបៗរបស់ខ្លួន ក្នុងនោះមានដូចជាប្រព័ន្ធការពារអាកាស  Patriot និង ប្រព័ន្ធរ៉ុក្កែត HIMARS។ 

 

ការធ្វើសមយុទ្ធយោធារួមរវាងហ្វីលីពីន និងអាម៉េរិក ធ្វើឡើងតែមួយថ្ងៃប៉ុណ្ណោះ ក្រោយចិន បានធ្វើសមយុទ្ធនៅជុំវិញកោះតៃវ៉ាន់ ដើម្បីបង្ហាញសាច់ដុំដាក់កម្លាំងគាំទ្រឯករាជ្យតៃវ៉ាន់៕