របាយការណ៍ជាច្រើន រួមទាំងដោយទីភ្នាក់ងារសារព័ត៌មាន Kyodo របស់ជប៉ុន បានចុះផ្សាយថា គ្រាប់បែកផ្សែងមួយគ្រាប់ត្រូវបានគេបំផ្ទុះនៅពេលនាយករដ្ឋមន្ត្រីជប៉ុនកំពុងថ្លែងសុន្ទកថា។ យ៉ាងណាមិញការបំផ្ទុះនេះ មិនបានបង្កគ្រោះថ្នាក់អ្វីឡើយ។ 

 

ទូរទស្សន៍ជាតិ NHK ជប៉ុននិងសារព័ត៌មានផ្សេងទៀតបាននិយាយថា មនុស្សម្នាក់ត្រូវបានឃុំខ្លួននៅទីតាំងកើតហេតុនៅភាគខាងលិចទីក្រុង Wakayama ប្រទេសជប៉ុន ជាកន្លែងដែលនាយករដ្ឋមន្រ្តីជប៉ុនលោក Fumio Kishida ត្រូវធ្វើការថ្លែងសុន្ទរកថា។

 

គួរបញ្ជាក់ថា ឧប្បត្តិហេតុនៅ Wakayama នេះបានកើតឡើង មិនដល់មួយឆ្នាំឡើយបន្ទាប់ពីការធ្វើឃាតអតីតនាយករដ្ឋមន្ត្រី Shinzo Abe ដែលបង្កការភ្ញាក់ផ្អើលជាខ្លាំងក្នុងប្រទេស និងបង្កឱ្យមានភាពរង្គោះរង្គើផ្នែកសន្តិសុខសម្រាប់មន្ត្រីសាធារណៈ។

 

យ៉ាងណាមិញ មិន ទាន់ មាន ការ បញ្ជាក់ ជា ផ្លូវការ ណាមួយពី ហេតុការណ៍ នេះ នៅឡើយ ដោយ ប៉ូលិស មូលដ្ឋាន បដិសេធ មិន ធ្វើ អត្ថាធិប្បាយ។

 

បើតាមវីឌីអូដែលចេញផ្សាយដោយទូរទស្សន៍ NHK សន្តិសុខ និងប៉ូលីសបានឃាត់ខ្លួនបុរសម្នាក់នៅកន្លែងកើតហេតុ ខណៈដែលហ្វូងមនុស្សមានភាពចលាចលនៅកន្លែងកើតហេតុ។

 

របាយការណ៍បាននិយាយថា វត្ថុដែលមានរាងដូចបំពង់មួយត្រូវបានគេបោះចោលនៅជិតលោក Kishida ហើយសំឡេងស្រដៀងនឹងការផ្ទុះត្រូវបានគេឮនៅកន្លែងកើតហេតុ។ យ៉ាងណាមិញ លោកនាយករដ្ឋមន្រ្តីត្រូវបានគេការពារដោយគ្មានគ្រោះថ្នាក់។

 

ការផ្ទុះនេះបានកើតឡើង ខណៈពេលដែលលោក Kishida ទើបតែចាប់ផ្តើមថ្លែងសុន្ទរកថាបន្ទាប់ពីបានធ្វើទស្សនកិច្ចនៅកំពង់ផែនេសាទនៅ Wakayama។

 

ជប៉ុនបានពង្រឹងសន្តិសុខជាតិបន្ទាប់ពីការធ្វើឃាតអតីតនាយករដ្ឋមន្ត្រី Shinzo Abe ដែលត្រូវបានបាញ់សម្លាប់នៅពេលលោកថ្លែងសុន្ទរកថានៅក្នុងព្រឹត្តិការណ៍យុទ្ធនាការមួយកាលពីខែកក្កដាឆ្នាំ ២០២២៕